Ўзбекистонда сукук ва янги турдаги облигациялар чиқарилиши мумкин
Қонунчилик палатаси капитал бозорини ислоҳ қилишга қаратилган қонун лойиҳасини биринчи ўқишда маъқуллади. Ҳужжат сукук ва бошқа замонавий молиявий воситаларни жорий этишни назарда тутади.
© bareksa.comОлий Мажлис Қонунчилик палатаси депутатлари «Капитал бозори тўғрисида»ги қонун лойиҳасини биринчи ўқишда қабул қилди. Ҳужжат Ўзбекистон капитал бозорини халқаро стандартлар асосида ривожлантириш, инвесторлар учун янги имкониятлар яратиш ҳамда замонавий молиявий инструментларни жорий этишга қаратилган.
Қонун лойиҳасига кўра, мамлакатда аҳоли ва инвесторлар учун бир қатор янги молиявий воситаларни муомалага чиқариш таклиф этилмоқда. Улар қаторига сукук (ислом облигациялари), барқарор ривожланиш облигациялари, қопланган облигациялар ҳамда секюритизатсияланган облигациялар киради.
Қонунчилик палатаси маълумотига кўра, мазкур янгиликлар капитал бозори иштирокчилари учун молиялаштириш манбаларини диверсификация қилиш, инвесторлар танловини кенгайтириш ва бозорнинг инвестициявий жозибадорлигини оширишга хизмат қилади.
Инвесторлар ҳимояси кучайтирилади
Қонун лойиҳасида инвесторлар ва фуқаролар ҳуқуқларини ҳимоя қилиш механизмларини такомиллаштиришга ҳам алоҳида эътибор қаратилган.
Хусусан, капитал бозори инфратузилмасини тартибга солиш, корпоратив бошқарув сифатини ошириш, компанияларнинг ахборотларни ошкор этиш бўйича мажбуриятларини кучайтириш ҳамда бозорда шаффофликни таъминлаш назарда тутилган.
Муҳокамалар давомида депутатлар маҳаллий ва хорижий инвесторларни жалб қилиш, корпоратив бошқарувнинг халқаро талабларга мослигини таъминлаш ҳамда қимматли қоғозлар бозорида иштирокчиларнинг масъулиятини оширишга қаратилган нормаларга алоҳида эътибор қаратди.
Халқаро стандартларга мослаштирилади
Ҳужжатда капитал бозори регулятори фаолиятини Қимматли қоғозлар комиссиялари бўйича халқаро ташкилот (IOSCO) тамойилларига мувофиқлаштириш ҳам кўзда тутилган.
Шунингдек, Марказий депозитарий ва рейтинг агентликлари фаолиятини такомиллаштириш, уларнинг ваколатлари ва ишлаш механизмларини халқаро амалиёт асосида қайта кўриб чиқиш таклиф этилмоқда.
Қонун ташаббускорларининг таъкидлашича, ушбу ҳужжат қабул қилиниши мамлакат молия бозорини янада чуқурлаштириш, янги инвестиция инструментларини жорий этиш ва иқтисодиётнинг реал секторини узоқ муддатли молиялаштириш имкониятларини кенгайтиришга хизмат қилади.
