Ўзбекистонга йил бошидан бери 161,4 минг тонна банан импорт қилинди
Мамлакатга банан импорт қилиш ҳажми ошмоқда. Бунда асосий улуш Эквадор ҳиссасига тўғри келди.
2025 йилнинг январ–ноябр ойларида Ўзбекистонга хориждан 161,4 минг тонна банан импорт қилинди. Бу ҳақда Миллий статистика қўмитаси маълум қилди.
Қайд этилишича, банан импорти ҳажми 2024 йилнинг шу даврига нисбатан 10,8 минг тоннага ошган. Бу мамлакатда цитрус меваларга бўлган талаб барқарор ортиб бораётганини ҳамда ташқи бозорлар билан савдо алоқалари кенгаяётганини кўрсатади.
Импорт таркибида Эквадор етакчи ўринни эгаллаб турибди. 2025 йилнинг 11 ойида Ўзбекистонга олиб кирилган бананларнинг қарийб асосий қисми — 145,9 минг тонна айнан ушбу мамлакат ҳиссасига тўғри келган. Эквадор дунёдаги энг йирик банан экспортёрларидан бири ҳисобланади.
Иккинчи ўринда Хитой жойлашган бўлиб, ушбу давлатдан 13,9 минг тонна банан етказиб берилган. Марказий Осиё давлатлари ҳам импорт географиясида мавжуд. Хусусан, Қозоғистондан 565,8 тонна, Қирғизистондан эса 337,3 тонна банан олиб кирилган.
Шунингдек, Туркиядан 384,9 тонна банан импорт қилинган. Қолган 324,6 тонна маҳсулот эса бошқа давлатлар ҳиссасига тўғри келади.
Маълумот ўрнида, 2025 йил январ–октябр ойларида Ўзбекистоннинг ташқи савдо айланмаси 66,5 млрд АҚШ долларини ташкил этган.
