Ўзбекистонлик Богдан Гусков UFC собиқ чемпиони Магомед Анкалаевга қарши жанг қилади

UFC ярим оғир вазн тоифаси жангчиси, ўзбекистонлик спортчи Богдан Гусков галдаги жангини россиялик собиқ чемпион Магомед Анкалаевга қарши ўтказади. Бу ҳақда UFC расмий саҳифасида хабар берилди.

Қайд этилишича, ярим оғир вазн тоифасида иштирок этувчи америкалик профессионал UFC жангчиси Халил Роунтри жароҳати туфайли UFC Fight Night Abu Dabi турнирининг марказий жангида қатнаша олмайди. Ушбу турнирга 25-июль куни «Etihad» аренаси мезбонлик қилади. Богдан Гусков шу пайтгача 18 та жангда ғалаба қозонган ва уларнинг барчасини муддатидан олдин тугатган. Шулардан 13 таси биринчи раунддаёқ қўлга киритилган. Бу Гусковнинг UFC’даги илк асосий жанги бўлади ва унда собиқ чемпион Анкалаевга қарши имкониятдан унумли фойдаланишга ҳаракат қилади.

«Бу ярим оғир вазн тоифасидаги ҳеч ким ўтказиб юбормаслиги керак бўлган тўқнашув бўлади», — дея ёзган ташкилот.

Негаки, ўзбекистонлик Богдан Гусковнинг бу рақиби UFC рейтингининг 1-рақамли жангчиси ҳисобланади. Гусков эса дивизионнинг 10-рақамини банд қилиб турибди.

Маълумот учун, Гусков охирги жангини 2025-йил декабрь ойида UFC 323 турнири доирасида Ян Блаховичга қарши ўтказганди ва жанг дуранг қайд этганди. Улар ўртасидаги реванш жанги 1-август куни бўлиб ўтадиган UFC Fight Night турнирига белгиланган. UFC доирасида шу кунгача Гусков жами 6 та жанг ўтказиб, шулардан 4 тасида ғалаба қозонган. Биттадан дуранг ва мағлубияти бор.

У 1992-йилда Оҳангарон туманида туғилган ва 19 ёшида Москвага кўчиб кетган. Гусков жангларга Россия ва Ўзбекистон байроқлари билан чиқади. У ўз интервьюларидан бирида Россияда яшаса ҳам, ўзини ўзбекистонлик деб билиши ва ҳар икки давлат учун ҳам охиригача курашишга тайёрлигини айтганди.

Анкалаев эса ўтган йил кузда UFC 320 турнирида бразилиялик Алекс Перейрани биринчи раундда техник нокаутга учратиб, чемпионлик камарига эга бўлганди.

Эслатиб ўтамиз, аввалроқ октагон Колизейнинг янги тарихига айлангани ҳақида ёзган эдик.