Пашинян ЕОИИни танқид қилди: «Ишчи кучи ва товарларнинг эркин ҳаракати бўлмаса, иттифоқ ҳам йўқ»

Арманистон бош вазири Никол Пашинян май ойи охирида Евроосиё иқтисодий иттифоқи (ЕОИИ) томонидан Арманистон бўйича қабул қилинган қарорни танқид қилди.

«Албатта, ҳамкасбларимга мен йўқлигимда қабул қилган баёноти юзасидан саволларим бор ва бу амалда нимани англатишини тушуниб олишимиз керак. ЕОИИнинг бирон бир давлати шунчаки уйғониб, исталган мамлакатга нисбатан шундай қарорлар қабул қилиши мумкинми, шуни англашимиз лозим? Менинг баҳолашимча, агар бу саволга жавоб ижобий бўлса, унда ЕОИИ ўзини тарқатиб юбораётганини эълон қилмоқда. Ва биз бундан хулоса чиқаришимиз керак. Жуда аниқ жавоб бўлиши лозим: ЕОИИ мавжудми ёки йўқ? Агар мавжуд бўлса, биз ўз позициямизни белгилаймиз, йўқ бўлса, махсус позицияни эгаллашга ҳожат қолмайди», — деди бош вазир.

Бундан ташқари, Пашинян Россия томонидан Арманистон маҳсулотлари импортига, шунингдек, арман товарларини ўз ҳудуди орқали ЕОИИнинг бошқа давлатларига экспорт қилишга қўйган чекловлари иттифоққа аъзо бир қатор мамлакатларда жиддий хавотир уйғотишини таъкидлади.

«Евроосиё иқтисодий иттифоқи бир нечта концептуал қоидаларга асосланади: ишчи кучи, товарлар, хизматлар ва молиянинг эркин ҳаракатланиши. Агар шулар бўлмаса, демак, Евроосиё иқтисодий иттифоқи ҳам йўқ», — дея қўшимча қилди у.

Еревандан референдум талаб қилинмоқда

Эслатиб ўтамиз, 29 май куни Пашинян иштирок этмаган ЕОИИ Олий кенгаши йиғилишида ташкилотга аъзо тўртта давлат — Россия, Қозоғистон, Беларус ва Қирғизистон президентлари Арманистонни имкон қадар тезроқ Евроосиё иқтисодий иттифоқи ва Европа Иттифоқи ўртасида танлов қилиш учун референдум ўтказишга чақирувчи баёнотни қабул қилган эди. Бундан ташқари, ушбу мамлакатлар етакчилари Арманистоннинг ЕОИИга аъзолиги масаласини ташкилот Олий кенгашининг кейинги йиғилишида кўриб чиқишга қарор қилган.

Сўнгги ҳафталарда Россия Арманистондан гуллар, сабзавотлар, мевалар, узум, картошка, қуритилган мевалар, тирик балиқ ва балиқ маҳсулотлари импортига бир қатор чекловлар жорий қилди. Пашинян бу қарорларни аввал ҳам сиёсийлаштирилган деб баҳолаган эди.