Президентдан огоҳлантириш олган ректорлар, қурилиши бошланган пуллик йўл ва ёшларга ажратиладиган пайшанба — 24 феврал дайжести

Вазирлик ва ҳокимликларда ҳар пайшанба – Ёшлар куни бўлади

Ўзбекистонда ҳар ҳафтанинг пайшанба куни вазирлик, идора ва ҳокимликларда «Ёшлар куни» сифатида белгиланиб, шу куни масъул раҳбарлар маҳалла, мактаб ва техникумларга бориб ёшлар билан очиқ мулоқот ўтказиши, уларнинг муаммо ва таклифларини жойида ҳал этиши белгиланди. Ёшларнинг таълим олиши, спорт билан шуғулланиши, касб ва хорижий тил ўрганиши, ишга жойлашиши ва тадбиркорлик фаолиятини бошлашига кўмаклашиш асосий вазифалардан бири этиб белгиланган.

Шунингдек, ёшлар ўртасида турли танлов ва ярмаркалар ўтказиш, иқтидорли ёшларни рағбатлантириш режалаштирилган. Президент Шавкат Мирзиёев мулоқот давомида Ўзбекистон ёшлар тараққиёти глобал индексда энг тез ривожланаётган давлат сифатида эътироф этилганини таъкидлади, шунингдек, Тошкентда Жаҳон ёшларининг тинчлик сари ҳаракати бош қароргоҳи ташкил этилиши ва Самарқанд Ёшлар парламенти аъзоларининг 12-глобал конференциясига мезбонлик қилиши маълум қилинди.

Ўзбекистон Президенти Беларус бош вазирини қабул қилди

Ўзбекистон Президенти Шавкат Мирзиёев 24 феврал куни расмий ташриф билан мамлакатга келган Беларус бош вазири Александр Турчинни қабул қилди. Учрашув аввалида беларус етакчиси Александр Лукашенконинг саломи ва эзгу тилаклари етказилди ҳамда олий даражадаги келишувларни амалга ошириш доирасида икки давлат ўртасидаги кўп қиррали шериклик муносабатларини янада кенгайтириш масалалари муҳокама қилинди.

Учрашувда савдо-иқтисодий ҳамкорлик юқори даражага кўтарилгани қайд этилиб, ўтган йили товар айирбошлаш ҳажми 25 фоизга ўсиб, қарийб 1 миллиард долларга етгани таъкидланди. Машинасозлик, электротехника, фармацевтика, тўқимачилик, озиқ-овқат саноати ва қишлоқ хўжалиги соҳаларида қўшма лойиҳаларни ривожлантириш, шунингдек, ҳудудлараро алоқалар ҳамда маданий-гуманитар алмашинувларни фаоллаштириш муҳимлиги қайд этилди.

Урганч–Хива пуллик йўли қурилиши бошланди

Ўзбекистондаги илк пуллик автомагистрал ҳисобланган Урганч–Хива йўналишидаги 35 километрли йўл қурилиши расман бошланди. 120 миллион доллар қийматга эга лойиҳа доирасида тўрт тасмали йўл барпо этилиб, 17 та кўприк, 8 та йўл ўтказгич, 1 та туннел ва 5 та махсус ўтиш жойи, шунингдек муҳандислик ва коммуникация тармоқлари қурилади. Йўлнинг ўтказувчанлик қобилияти кунига 20 мингдан ортиқ транспорт воситасини ташкил этиши кутилмоқда.

Лойиҳа бешта участкага бўлинган ҳолда бир нечта пудрат ташкилотлари иштирокида амалга оширилмоқда, қурилиш жараёни халқаро маслаҳатчилар ва лабораториялар томонидан назорат қилинмоқда. Йўлда сунъий интеллект асосида ишлайдиган рақамли қурилмалар ўрнатилиб, транспорт оқимини автоматик бошқариш режалаштирилган. Магистрал фойдаланишга топширилгач, ҳозир бир соатгача давом этадиган сафар вақтини 17 дақиқагача қисқартириш, шунингдек хизмат кўрсатиш пунктлари ва хавфсизлик инфратузилмасини ташкил этиш кўзда тутилган.

Президент университет ректорларини огоҳлантирди

Президент Шавкат Мирзиёев ёшлар билан учрашуви давомида олий таълим муассасалари фаолиятини танқид қилиб, битирувчиларни иш билан таъминлаш масаласида айрим ректорларнинг сусткашлигини таъкидлади. Давлат раҳбарига кўра, республикадаги 157 та олийгоҳдан фақат 12 таси битирувчилар билан лойиҳалар ташкил этиб, банк кредити орқали 100 нафардан ортиқ талабани тадбиркорликка жалб қилган. Шу муносабат билан ректорларнинг масъулияти ва фаолиятига жиддий саволлар қўйилди.

Учрашувда таълим сифати ҳам танқид қилиниб, олийгоҳ битирувчиларининг барчаси иш билан таъминланмаётгани ва мактабни тугатган ўқувчиларнинг хорижий тилни етарли даражада ўзлаштирмаётгани қайд этилди. Президент мактаб директорлари ва ўқитувчилар масъулиятига ҳам тўхталиб, ҳар бир раҳбар ва мутахассис натижа учун жавобгарликни ҳис қилиши лозимлигини таъкидлади.

Солиқ қоидабузарликлари ҳақида хабар берганларга 3 млрд сўм мукофот пули берилди

2026 йил январ ойида Солиқ қўмитасига соҳавий ҳуқуқбузарликлар бўйича 12 486 та мурожаат келиб тушган ва улар асосида ўтказилган текширувларда қонунбузарликларнинг 99 фоизи тасдиқланган. Қўмита маълумотига кўра, 1 739 та мурожаат такрорий ёки текширув жараёнида экани сабабли кўриб чиқилмаган, қолганлари асосида 5 198 та сайёр солиқ текшируви ташкил этилган. Энг кўп шикоятлар харид чеки бермаслик ҳолатлари бўйича бўлиб, бундай мурожаатлар сони 10 879 тани ташкил этган.

Шунингдек, 510 та ҳолатда тўловни пластик карта орқали қабул қилмаслик, 34 та ҳолатда эса пластик карта учун харид суммасини ошириш ҳолатлари қайд этилган. Қонунбузарликлар ҳақида хабар берган фуқароларга 4 782 та ҳолат бўйича ундирилган жарима суммасининг 20 фоизи, яъни жами 3 миллиард сўм мукофот пули тўланган.