Путинга интернет узилганидан шикоят қилишди, аммо у жавоб бермади

Мобил интернетнинг мунтазам равишда ўчириб қўйилиши ҳам оддий россияликлар, ҳам бизнес ҳаётини сезиларли даражада қийинлаштирмоқда — шу муносабат билан ҳукуматдан «мувозанатли қарор» керак. Бу ҳақда Россия саноатчилар ва тадбиркорлар иттифоқи (РСТИ) раҳбари Александр Шохин иттифоқ қурултойида сўз очди.

«Алоҳида мавзу — бу мобил интернетнинг чекланиши бўлиб, у ҳам бизнес, ҳам фуқаролар ҳаётини мураккаблаштирди. Бу масалалар мамлакат хавфсизлиги ва оқ рўйхатдаги сайтлар ишини таъминлаш зарурияти билан боғлиқлигини, шубҳасиз, тушунамиз. Аммо мобил технологиялар ҳаётимизга чуқур кириб борганини ҳисобга олиб, бу борада тизимли ва мувозанатли ечим топилишидан умидвормиз, гарчи бу осон вазифа эмаслигини англасак-да», — дея Шохиннинг сўзларидан иқтибос келтирди «РИА Новости».

«Faridaily» ёзишича, РСТИ раҳбари йиғилишда намойиш этган тақдимотда Россия компанияларининг 40 фоизи мобил технологияларсиз ишлай олмаслиги ҳақидаги слайд кўрсатилган.

Мазкур йиғилишда мамлакат президенти Владимир Путин ҳам иштирок этган. У ўз нутқида Яқин Шарқдаги уруш ва энергия ресурслари бозоридаги инқироз, суверенитетнинг муҳимлиги ва Россияда барқарорликни сақлаш, давлатнинг бизнес билан ҳамкорлиги ҳақида гапирди. Шохин тилга олган алоқа билан боғлиқ муаммоларга Путин ҳеч қандай изоҳ бермади.

«Агентство»га кўра, президент саҳнада тахминан 35 дақиқа бўлган ва тадбиркорлар билан амалда мулоқот қилмаган — залдан ёки учрашув модератори томонидан берилган саволларга жавоб қайтармаган. Путин ўз нутқидан сўнг Шохиннинг олдига келиб, микрофонсиз нимадир деган, шундан сўнг РСТИ раҳбари қурултойни ёпиқ деб эълон қилган.

Москвада уч ҳафта давомида мобил интернет ва уяли алоқа бўлмади. Расмийлар чекловларни «хавфсизлик манфаатлари» билан изоҳлади. Оммавий ахборот воситалари маълумотларига кўра, Москва марказидаги ўчиришлар «ФҚБ» талаби билан амалга оширилган. Мобил интернет билан боғлиқ муаммолар Россиянинг бошқа йирик шаҳарларида ҳам мунтазам равишда юзага келмоқда.