«Қора танлилар — маймун эмас»: конгрессмен Трамп нутқи пайтида залдан олиб чиқилди

АҚШ Конгресси аъзоси Эл Грин президент Доналд Трампнинг Конгрессга мурожаати вақтида Ваколатчилар палатаси мажлислар залидан олиб чиқмб кетилди. Бу ҳақда CNN хабар берди.

Телеканал маълумотларига кўра, Эл Грин Демократик партия аъзоси ҳисобланади. Трамп чиқиш қилаётган вақтда у «Қора танлилар — маймун эмас» деган ёзувли плакатни кўтарган.

«У Трампнинг ижтимоий тармоқларда жойлаштириб, кейинроқ ўчирилган ирқчиликка оид видеосига қарши норозилик билдирди. Ушбу видеода собиқ президент Барак Обама ва собиқ биринчи хоним Мишел Обама ўрмондаги маймунлар сифатида тасвирланган эди», - дейилади материалда.

Ўзи нима гап?

Эслатиб ўтамиз, феврал ойи бошида Трамп ўз аккаунтида бир дақиқалик роликни жойлаштирган эди. Унда дастлаб 2020 йилги АҚШ сайловларидаги сохталаштиришлар ҳақида сўз юритилади. Кейин ролик кескин тўхтаб, собиқ президент Барак Обама ва унинг турмуш ўртоғи Мишел Обама маймун қиёфасида акс этган тасвир пайдо бўлади.

Бу пост Трамп манзилига нисбатан танқидлар тўлқинини келтириб чиқарди, айрим фойдаланувчилар уни ирқчиликда айблади.

Оқ уй эса баёнотида видеода ирқчилик мазмуни йўқлигини билдириб, бу қайта ишланган интернет мем экани, унда республикачи Трамп ўрмон шоҳи қиёфасида, Демократик партия вакиллари эса анимацион филм қаҳрамонлари сифатида кўрсатилганини таъкидлади.

Танқидлардан сўнг Трамп роликни ўчириб ташлади. Айтиш жоизки, ўтган йил апрелида Грин Трампга нисбатан импичмент ташаббуси билан чиқишини маълум қилган эди. Аммо июн ойида конгрессменлар Трампга импичмент элон қилиш уринишини рад этган.