Қозоғистон олти ойда тахминан 2,2 млрд долларлик машина ишлаб чиқарди

2026-йилнинг январь–июнь ойларида Қозоғистонда автомобиль ишлаб чиқариш ҳажми 1,2 триллион тенгени (тахминан 2,2 миллиард доллар) ташкил этди. Бу ўтган йилнинг шу даврига нисбатан 15,7 фоизга кўп. Бу ҳақда «Ranking.kz» хабар берди.

Таққослаш учун, 2025-йилнинг шу даврида ўсиш 22,4 фоиз бўлган. Узоқ йиллик кўрсаткичларга қараганда, автомобиль саноати Қозоғистон саноатининг энг тез ривожланаётган тармоқларидан бири бўлиб қолмоқда. 2015–2016-йиллардаги пасайишдан кейин ишлаб чиқариш ҳажми ҳар йили ошиб бормоқда.

2023-йилда автомобиль ишлаб чиқариш ҳажми 1,8 триллион тенге, 2024-йилда 1,9 триллион тенге, 2025-йилда эса 25,6 фоизга ошиб 2,4 триллион тенгега етди. Таққослаш учун, 2015-йилда бу кўрсаткич атиги 80 миллиард тенге бўлган.

Ишлаб чиқариш кенгайгани сари автомобиль саноатининг машинасозликдаги улуши ҳам ошди. 2015-йилда у 13 фоизни ташкил этган бўлса, 2020-йилда 33,9 фоиз, 2025-йилда эса 41,9 фоизга етган. 2026-йилнинг дастлабки олти ойида автомобиль саноати Қозоғистон машинасозлик ишлаб чиқаришининг 41,4 фоизини ташкил этди. Ўтган йили бу кўрсаткич 40,9 фоиз бўлган.

Шунингдек, жорий йилнинг январь–июнь ойларида автомобиль, тиркама ва ярим тиркамалар ишлаб чиқариш мамлакат қайта ишлаш саноати ҳажмининг 7,1 фоизини, умумий саноат ишлаб чиқаришининг эса 3,3 фоизини ташкил этди. Бу кўрсаткичлар ўтган йил даражасига деярли тенг бўлиб қолмоқда.

Эслатиб ўтамиз, аввалроқ Қозоғистон янги алоқа сунъий йўлдоши учун 22 миллион доллардан ортиқ маблағ ажратганди.