Роберт Кийосаки: Олтин нархи 27 минг долларгача ошади

Америкалик тадбиркор, инвестор ва ёзувчи, «Бой ота, камбағал ота» бестселлери ҳамда инвестиция бўйича бир қатор китобларнинг муаллифи Роберт Кийосаки бир унция олтиннинг нархи 27 минг долларгача ошиши мумкинлигини прогноз қилди. Бу ҳақда у «X» ижтимоий тармоғидаги саҳифасида ёзди.

«Олтин 5000 доллардан ошди. Ура!!! Олтиннинг келажаги – 27 000 доллар», — деди Роберт Кийосаки.

Кеча, 26 январ куни биржа савдоларида олтин нархи тарихда илк бор унциясига 5 минг доллардан ошди. Чикаго товар биржасида (CME) февраль ойига мўлжалланган олтин фьючерси нархи савдоларда унциясига 5100 доллардан ошгани қайд этилди. Кумуш ва платина ҳам қимматлади. Қимматбаҳо металлларга талаб АҚШ активларига бўлган ишонч пасайиши, геосиёсий кескинлик ва иқтисодий номаълумлик сабаб кучайди.

2023 йил бошида ҳам Роберт Кийосаки олтин нархи унциясига 5000 долларга кўтарилишини олдиндан тахмин қилган. Кийосаки ўшанда АҚШ Федерал захира тизими миллиардлаб янги долларларни босишига мажбур бўлиши, бу эса Америка валютасига ишончнинг йўқолиши ва олтин, кумуш ҳамда биткоиннинг машҳур бўлишига олиб келишини ёзган. Унинг олтин нархи ҳақидаги прогнози амалга ошди, бироқ кутилгандан кейинроқ: у бу даражага 2025 йилгача етилишини тахмин қилган эди.

«Катта инқироз яқинлашмоқда. Депрессия эҳтимоли бор. Федерал захира тизими миллиардлаб сохта пуллар босишга мажбур. 2025 йилга келиб олтин нархи 5000 доллар, кумуш 500 доллар ва биткоин 500 минг долларга етади. Нима учун? Чунки АҚШ долларига, сохта пулга бўлган ишонч бузилади», — деб ёзган ўшанда Кийосаки X ижтимоий тармоғида.

Роберт Кийосаки 2023 йилда ҳам инвесторларга молия бозорларидаги дунё тарихидаги энг катта фалокатга тайёрланишни ва портфелларини олтин, кумуш, биткоин, кўчмас мулк ҳамда нефт компаниялари акциялари тарафга ўзгартиришни маслаҳат берган. Кийосакининг фикрича, антикризис портфели 75% олтин, кумуш ва биткоиндан, қолган 25% нефт компаниялари акциялари ва кўчмас мулкдан ташкил топиши керак эди.

«Бундай структура сизга дунё тарихидаги энг катта фалокатдан омон чиқишга ёрдам бериши мумкин», — деб ёзган у.

2024 йилда у инвесторларни кумуш нархи унциясига 50 долларга етмагунигача шу металлга сармоя киритишга чақирган. Ўша вақтда кумуш унцияси 34,7 доллар атрофида савдолашган. Сўнгги 12 ой ичида кумуш нархи 255 фоизга ошган. 23 январ куни савдоларда кумуш нархи тарихда илк бор унциясига 100 доллардан ошди.

Олтин нархи сўнгги 12 ойда 84 фоизга ўсган. Таҳлилчилар фикрича, геосиёсий вазият ва марказий банкларнинг сотиб олиш ҳажми кўпайиши олтин нархининг ўсишига имконият беради. Хусусан, «Goldman Sachs» таҳлилчилари 2026 йил декабригача олтин нархи прогнозини унциясига 4900 доллардан 5400 долларга оширди.

Лондон қимматбаҳо металллар бозори иштирокчилари уюшмаси томонидан ўтказилган йиллик таҳлилчилар сўрови натижаларига кўра, 2026 йили олтин нархи унциясига 7150 долларгача ошиши мумкин ва йиллик ўртача нарх 4742 долларни ташкил этади.

Олтин нархининг яқиндаги ўсиши геосиёсий кескинлик, жумладан АҚШ ва НАТО ўртасида Гренландия борасидаги келишмовчиликлар, АҚШ импорт божларига қўйилаётган тарифлар бўйича номаълумлик ва АҚШ Федерал захира тизими мустақиллигини йўқотиш хавфининг ошиши билан боғлиқ. Қимматбаҳо металлар нархига АҚШнинг пул-кредит сиёсатини юмшатиши, Марказий банкларнинг фаол сотиб олишлари ва олтин қўллаб-қувватланган биржа фондига рекорд миқдорда маблағ кириши ҳам таъсир қилди.