Россия бензин экспортига қўйилган чекловларни юмшатди
Россия ишлаб чиқариш қувватларида ортиқча захира тўпланиб қолишининг олдини олиш мақсадида нефт компаниялари учун бензин етказиб беришга қўйилган тақиқни бекор қилди. Ишлаб чиқарувчи бўлмаганлар учун эса у июл ойи охиригача узайтирилди.
Россия ҳукумати мамлакатдан бензин, дизел ёқилғиси ва бошқа турдаги ёқилғилар экспортига қўйилган тақиқни 2026 йил 31 июлгача узайтирди, бироқ эндиликда бу чеклов нефт маҳсулотларини бевосита ишлаб чиқарувчиларга татбиқ этилмайди. Бу ҳақда кеча, 31 январ куни Россия ҳукумати матбуот хизмати хабар қилди.
Матбуот баёнотида айтилишича, нефт маҳсулотлари экспортига қўйилган чекловлар “ички ёқилғи бозорида барқарор вазиятни сақлаб туришга қаратилган”. Шу билан бирга, ҳукумат фикрича, ишлаб чиқарувчилар учун истисно жорий этилиши “нефт компанияларининг ишлаб чиқариш қувватларида ортиқча маҳсулот тўпланиб қолиши хавфини олдини олиш” имконини беради.
Россиядан ёқилғи экспортига қўйилган чекловлар
Россиянинг Украинага қарши кенг кўламли ҳарбий бостириб киришидан сўнг, ҳукумат ички бозорда нархларни пасайтириш мақсадида бензин экспортига бир неча бор вақтинчалик тақиқ жорий этган. Тўлиқ эмбарго 2023 йил сентябр ойида мамлакат ичида ёқилғининг улгуржи нархлари кескин ошгани сабабли киритилган эди.
2024 йил март ойида Украина учувчисиз учоқларининг Россия нефтни қайта ишлаш заводларига ҳужумлари фонида тўлиқ тақиқ яна жорий қилинди. Кейинчалик эмбарго вақти-вақти билан тўхтатиб турилди, аммо сўнг яна – тўлиқ ёки қисман – қайта жорий этилди. Охирги марта чекловлар 2025 йил декабр ойи охирида узайтирилган эди.
