Россия Давлат Думасида депутатларни суратга олиш тақиқланди: хунук фотолар сабаб

Россия Давлат думасида йиғилишларни ёритиш қоидалари кескин ўзгартирилди. Энди фотомухбирлар парламент мажлисларига қўйилмайди, суратга олиш учун доимий ишлатилган балкон эса фақат федерал телеканал операторлари учун ажратилди. Парламент матбуот хизмати ушбу қарорни ички тартиб қоидалари билан изоҳлади.

Амалиётда бу қарор мустақил фотожурналистлар ва ахборот агентликлари учун парламент фаолиятини визуал тарзда ёритиш имкониятини деярли йўққа чиқаради. Энди жамоатчилик депутатларни фақат давлат телеканаллари танлаган ракурс ва кадрлар орқали кўриши мумкин. Бу эса ахборот очиқлиги даражаси пасайиши ҳақидаги баҳсларни янада кучайтирди.

Кузатувчиларга кўра, фотомухбирлардан воз кечиш — техник эмас, балки сиёсий қарор сифатида баҳоланмоқда. Чунки парламент фаолиятидаги визуал назорат жамоат фикрини шакллантиришда муҳим ўрин тутади.

Володиннинг танқиди

Қарор қабул қилиниши арафасида РФ Давлат Думаси спикери Вячеслав Володин фотомухбирларни очиқ танқид қилди. У ялпи мажлисда думалик фотографларни депутатларни атайлаб «ёмон ҳолатда кўрсатиш»да айблади. Володиннинг айтишича, айрим кадрлар инсон ҳаётида бўлиши мумкин бўлган оддий ҳолатларни нотўғри талқин қилишга олиб келади.

У депутатлар ҳеч қачон журналистлар устидан кулиш ёки уларни масхара қилиш билан шуғулланмаслигини таъкидлаб, фотосуратчилар ҳам шу тамойилга амал қилиши кераклигини билдирди. Бу сўзлар парламентдаги ахборот сиёсатида қаттиқроқ назорат ўрнатиш истаги борлигини очиқ намоён қилди.

Шу билан бирга, танқид фотожурналистика касбий стандартлари ва сўз эркинлиги масаласида кескин баҳсларга сабаб бўлди. Чунки сурат — воқеликни талқин қилишнинг мустақил шакли ҳисобланади.

Очиқликка зид манзара

Сўнгги ойларда кўплаб россиялик депутатлар ўзларининг фотосуратларда қандай чиқишидан норози эканини яширмай келаётган эди. Ҳатто ҳукмрон «Единая Россия» партияси ўз аъзоларига фотомухбирлар мавжудлигини эслатиб, катта планда кадрга тушиб қолиш эҳтимоли борлигини огоҳлантирган. Бу ҳолат визуал назоратдан қочишга уриниш сифатида қабул қилинди.

Эътиборли жиҳати шундаки, бундан атиги бир ой олдин, 28 декабр куни Вячеслав Володин айнан шу фотомухбирларга миннатдорлик билдириб, Россия Давлат думасини «дунёдаги энг очиқ парламент» деб атаган эди. Қисқа вақт ичида бундай кескин бурилиш ахборот сиёсатидаги изчилликка шубҳа уйғотди.