Россия ўз танкерини Америка томонидан қўлга олинишига кескин муносабат билдирди
Расмий Москва очиқ денгизда кемани тўхтатиш ва текшириш фақат қатор чекланган ҳолатларда, жумладан қароқчилик ёки қул савдоси гумони бўлганда мумкин эканини эслатди.
Россия Ташқи ишлар вазирлиги Атлантика океанида Bella 1 (Marinera) нефт танкерининг Америка ҳарбийлари томонидан тўхтатилишини ноқонуний куч ишлатиш деб баҳолаб, Вашингтонни халқаро денгиз ҳуқуқи нормаларини ва кемачилик эркинлигини қўпол равишда бузишда айблади. Бу ҳақда ТАСС хабар бермоқда.
Қайд этилишича, очиқ денгизда кемани тўхтатиш ва кўздан кечириш фақат қароқчилик ёки қул савдоси каби халқаро миқёсда тан олинган истисно ҳолатлардагина мумкин. Россия байроғи остида сузган Bella 1'нинг АҚШ ҳарбийлари томонидан тинч кемага чиқиши ва экипажнинг асирга олиниши эса халқаро денгиз ҳуқуқи тамойилларига мутлақо зиддир. Шунингдек, кема эгасининг қонуний манфаатлари камситилгани ва турли давлат фуқароларидан иборат экипаж аъзоларининг ҳаёти ҳамда соғлиғи хавф остида қолгани алоҳида қайд этилди.
Москва АҚШнинг санкция қонунчилигига таяниб қилинган изоҳларини асоссиз деб атаб, ғарб чекловларини ноқонуний, деб ҳисоблашини билдирди. ТИВ Вашингтоннинг кескин халқаро инқирозлар яратишга тайёр эканидан ташвиш билдирар экан, АҚШни халқаро денгиз судоходстви қоидаларига қайтишга чақирди.
Financial Times ва BBCнинг рус хизматига кўра, Bella 1 2025 йил охиридан Рязан областида рўйхатдан ўтган «Буревестмарин» компаниясига тегишли. Ушбу корхона 2025 йилнинг июль ойида тадбиркор Илья Бугай томонидан ташкил этилган бўлиб, у шу билан бирга нефть маҳсулотлари савдоси билан шуғулланувчи бошқа бир тузилманинг ҳам раҳбари ҳисобланади. Мазкур компания илгари юқори даромад кўрган бўлса-да, сўнгги вақтларда унинг молиявий кўрсаткичлари сезиларли даражада пасайган ва зарар кўришни бошлаган.
Америка Қўшма Штатлари ҳукумати эса мазкур вазиятга мутлақо бошқача ёндашмоқда. АҚШ вице-президенти Жей Ди Вэнс қўлга олинган кемани амалдаги санкциялар режимини айланиб ўтишга уринишда айблади. Расмий маълумотларга кўра, Bella 1 ва Sophia танкерлари Эрон, Венесуэла ва Россиянинг санкция остидаги нефтини ташигани учун АҚШ Молия вазирлигининг қора рўйхатига киритилган эди. Вашингтон бу каби кемаларни соядаги флот сифатида таснифламоқда.
Россия Транспорт вазирлиги ҳам БМТнинг Денгиз ҳуқуқи бўйича конвенциясига таянган ҳолда, очиқ денгизда сузиш эркинлиги режимини эслатиб ўтди. Вазирлик ҳеч бир давлат бошқа мамлакат юрисдикциясидаги кемаларга нисбатан куч ишлатиш ҳуқуқига эга эмаслигини қатъий таъкидламоқда.
Москва АҚШ ҳарбийларининг Россия байроғи остида сузган нефт танкерини ушлаши халқаро денгиз ҳуқуқига зид эканини билдирди.
