Россия Путиннинг Курил оролларига ташрифини танқид қилган Японияга таҳдид қилди

Россия Ташқи ишлар вазирлиги Япония бош вазири Санаэ Такаичининг Владимир Путиннинг Курил оролларига ташрифини танқид қилган баёнотлари юзасидан Токиога қатъий норозилик билдирди. Бу ҳақда Nur.kz нашри маълум қилди.

Хабарга кўра, 18 август куни Япониянинг Россиядаги элчиси Акира Муто Россия Ташқи ишлар вазирлигига чақиртирилган. Ташқи ишлар вазири ўринбосари Михаил Галузин япон дипломатига Владимир Путиннинг Итуруп оролига ташрифи юзасидан Япония ҳукумати раҳбарининг баёнотлари муносабати билан қатъий норозилик тақдим этган.

Томонларнинг позицияси ва қарама-қарши даъволар

Россия томони Курил оролларининг жанубий қисми устидан ўз суверенитети дахлсиз эканлигини даъво қилмоқда.

Вазирлик баёнотида ушбу ҳудудлар Иккинчи жаҳон уруши якунларига кўра, БМТ устави ва Иттифоқчи давлатларнинг келишувлари асосида Россияга ўтгани таъкидланган. Шунингдек, Москва Токионинг санкциялар сиёсати ва Киевни қўллаб-қувватлаши фонида ўзида «адекват жавоб чораларини кўриш ҳуқуқини қолдириши» япон дипломатик миссияси раҳбарига маълум қилинган, дейилади хабарда.

Ўз навбатида, расмий Токио Россия президенти Владимир Путиннинг ўтган ҳафтада Курил оролларига амалга оширган илк ташрифига кескин реакция билдирган. Япония ҳукумати мазкур ташриф юзасидан норозилик билдириб, буни япон халқининг ҳис-туйғуларини ҳақорат қилиш деб баҳолаган.

Япония бош вазири Санаэ Такаичи Токио томонидан «Шимолий ҳудудлар» деб аталувчи Кунашир, Шикотан, Итуруп ва Хабомаи ороллари «Япониянинг азалий ҳудуди» эканлигини таъкидлаган. Унга кўра, мазкур ороллар тарихий нуқтаи назардан ҳам, халқаро ҳуқуққа кўра ҳам Японияга тегишлидир, дея унинг сўзларидан иқтибос келтирди нашр.

Бунга жавобан Россия ТИВ расмий вакили Мария Захарова Санаэ Такаичининг сўзлари «мутлақо қабул қилиб бўлмас» ҳолат эканлигини ва барча Курил ороллари «Россиянинг ажралмас қисми» саналишини айтган.