Россия Украинага 2026 йил бошидан буён энг йирик ёпирилма зарба берди
Россия армияси энергетик «сулҳ» тугаши ортидан Украинага ракета ва дронлар билан ёпирилма ҳужум қилди: асосий зарбалар энергетика ва аҳоли пунктларига қаратилди.
Россия ҳарбийлари 3 февралга ўтар кечаси Украина ҳудудига 71 та ракета ва 450 та дрон учирди. Украина Қуролли кучлари Ҳарбий ҳаво кучлари маълумотига кўра, бу 2026 йил бошидан бери энг оммавий ҳужум ҳисобланади. Зарбада 32 та баллистик «Искандер-М» ва тўртта ҳипертовушли «Циркон» ракеталари қўлланган. Асосий йўналишлар Киев, Харкив, Днепр, Винница, Одесса ва Суми областлари бўлган. Украина томони 38 та ракета ва 412 та дронни йўқ қилганини маълум қилди.
Володимир Зеленский ҳужумлар совуқ кунларда қасддан энергетика инфратузилмасига қаратилганини билдирди. Унинг айтишича, турар жой бинолари ва болалар боғчаси ҳам зарар кўрган. Ҳужум оқибатида камида тўққиз нафар фуқаро жароҳат олган. Зарба «энергетик танаффус» тугаши ортидан иккинчи кун кетма-кет амалга оширилган.
Киев ва Харкив кўпроқ талафот кўрди
Украина бош вазири Денис Шмигалнинг таъкидлашича, ҳужум қилинган ИЭЦ ва ИЭСлар фақат аҳолини иситиш режимида ишлаган. Киев ва Киев областида Трипол ИЭС ҳамда Ривне АЭСни пойтахт Киев билан боғловчи 750 kVли нимстанция зарар кўрган. Киевда 1170 та кўп квартирали уй иссиқликсиз қолган, деди шаҳар мэри Виталий Кличко.
Харкивда ҳужумлар 820 та кўп квартирали уйда иссиқлик таъминотини тўхтатган. Шаҳарнинг асосий объектларидан бири — ИЭЦ-5 жиддий шикастланган ва уни тиклаш имкони йўқ, деди шаҳар кенгаши депутати Богдан Ткачук. Шаҳар мэри Игор Терехов ҳам бир қатор подстанциялар ишдан чиққанини тасдиқлади.
Винница областида Ладижинск ИЭС нишонга олинди, 50 га яқин аҳоли пункти электрсиз қолди. Днепропетровск областида Приднепровск ИЭС зарба остида қолган. Одесса областида ДТЭК объектига ҳужум қилинган, 50 мингдан ортиқ одам электрсиз қолганини област ҳарбий маъмурияти раҳбари Олег Кипер билдирди. Суми областида эса Конотоп шаҳри қисман қоронғуликка чўмди.
Трампнинг илтимоси уч кунга етди
29 январ куни Доналд Трамп Россия президенти Владимир Путин илтимосига кўра кучли совуқлар сабаб бир ҳафтага зарбаларни тўхтатишга рози бўлганини айтган эди. Кремл келишув 1 февралгача амал қилишини маълум қилган. 2 февралдан ҳужумлар қайта тикланган.
