Санкцияларни айланиб ўтишга мўлжалланган Россия стейблкоини айланмаси 100 млрд доллардан ошди
Таҳлилчилар ҳисоботига кўра, рублли стейблкоин орқали амалга оширилган операциялар ҳажми рекорд даражага етди ва санкциялар самарадорлигига саволлар туғдирди.
2026 йил 22 январда эълон қилинган «Elliptic» ҳисоботига кўра, рублга боғланган A7A5 ишга туширилганидан кейин бир йилга ҳам етмай, 100 млрд ДОЛЛАРдан ортиқ маблағ айланмасида фойдаланилган. Таҳлилчилар 250 мингга яқин транзакцияни, 41,3 мингта уникал манзил иштирокида қайд этган. Токен эгалари сони эса 2025 йил ёзидаги 14 мингдан 35,5 мингтагача ошган.
Elliptic маълумотларига кўра, A7A5 асосан рубл ва долларга боғланган USDT ўртасидаги «кўприк» вазифасини бажаради. Бу механизм маблағларни доллар криптоликвидлигига тез ўтказиш, кейин эса қайта рубл зонасига қайтариш имконини бериб, блокировкалар хавфини камайтиради.
Санкция шароитида ўсиш
2025 йил сентябрида A7A5 Россияда рақамли молиявий актив сифатида тан олинди ва экспорт операцияларида қўллашга рухсат берилди. Фаолликнинг янги тўлқини эса кузда, токенни «Промсвязбанк» карталари орқали сотиб олиш имконияти очилганидан кейин кузатилди. Фақат шу канал орқали тахминан 26 млн доллар ўтказилган.
Бундан ташқари, хорижий сервислар учун тўлов қилишга мўлжалланган «Stablepay» виртуал картаси ҳамда A7A5 билан таъминланган рақамли қарз распискаси жорий этилди. Ушбу распискадан 2,3 минг дона чиқарилиб, $8,6 млнлик айланма амалга оширилган. Лойиҳа молдовалик бизнесмен Илан Шор ва банк иштирокида ишга туширилган.
Чекловлар ва секинлашув
Шунга қарамай, «Elliptic» маълумотларига кўра, 2025 йил июлидан кейин йирик янги токен чиқаришлар деярли қайд этилмаган. Кунлик ўртача айланма 1,5 млрд доллардан 500 млн долларгача пасайган. Таҳлилчилар бунга халқаро санкциялар сабаб бўлаётганини таъкидлайди.
Европа Иттифоқи санкцияларининг 19-пакети доирасида A7A5, унинг эмитенти «Old Vector» ва «Grinex» биржаси чекловларга тушди. АҚШ ҳам август ойида шундай чора кўрди. 2025 йил ноябрида эса «Uniswap» платформаси A7A5га эга бўлишни чеклади. Мутахассислар фикрича, A7A5 мисоли долларда бўлмаган стейблкоинлар санкцияларни айланиб ўтишда самарали эканини кўрсатди, аммо босим кучайиши унинг келажак ўсишини чеклаб қўяди.
