Саноат кооперацияси ва давлат харидлари агентлиги ташкил этилади
Президент фармонига кўра, Иқтисодиёт ва молия вазирлигининг давлат харидлари соҳасидаги вазифа, функция ва ваколатлари агентликка ўтказилади.
Ўзбекистонда Саноат кооперацияси ва давлат харидлари агентлиги ташкил этилади. Бу Президент Шавкат Мирзиёевнинг 4 феврал куни қабул қилинган «Маҳаллий ишлаб чиқариш ва саноат кооперациясини янги тизим асосида ривожлантириш бўйича биринчи навбатдаги чора-тадбирлар тўғрисида»ги фармонида белгиланган.
Фармонга кўра, қуйидагилар ташкил этилади:
Саноат кооперацияси ва давлат харидлари агентлиги (Агентлик);
Саноат кооперацияси ва давлат харидлари агентлиги бошқарув кенгаши.
Иқтисодиёт ва молия вазирлигининг давлат харидлари соҳасидаги вазифа, функция ва ваколатлари Агентликка ўтказилади.
Бахтиёр Халимович Хайдаров Ўзбекистон Республикаси Саноат кооперацияси ва давлат харидлари агентлиги директори лавозимига тайинланди. У бунга қадар Тошкент шаҳар ҳокимининг молия-иқтисодиёт ва камбағалликни қисқартириш масалалари бўйича биринчи ўринбосари вазифасида ишлаётганди.
2026 йил 1 июлдан:
Агентлик республика ва минтақа бозорини таҳлил қилиб, миллий иқтисодиётга қўшиладиган қиймат занжирларини оширишга хизмат қилувчи ўзлаштириш тавсия этиладиган рақобатбардош маҳсулотлар рўйхатини соҳалар кесимида босқичма-босқич шакллантиради ва эълон қилиб боради;
ўзлаштириш тавсия этиладиган рақобатбардош маҳсулотлар рўйхатига киритилган маҳсулотларни ўзлаштирган тадбиркорлар билан ўрнатилган тартибда кафолатли харид шартномалари тузилади;
Тадбиркорлик субъектларининг барқарорлик рейтингини шакллантиришда маҳсулотларни ишлаб чиқаришда яратилган қўшилган қиймат улуши қўшимча балл берувчи кўрсаткичларга киритилади.
Давлат харидларининг самарадорлиги
Фармонга кўра, 2027 йил 1 январдан:
кичик ва ўрта тадбиркорлик субъектларининг давлат харидларидаги иштирокини кенгайтириш мақсадида давлат харидларида харид предметини технологик занжирлар, функционал босқичлар ва иш турлари кесимида алоҳида лотларга бўлиш амалиёти жорий этилади;
корпоратив буюртмачиларда «профессионал харидор» сертификатига эга мутахассислар мавжуд бўлмаган тақдирда, 2028 йил 1 январдан бошлаб улар давлат харидларида иштирок этиши тақиқланади.
2026 йил 1 июлдан эса воситачи-брокер ва (ёки) дилерларга ишлаб чиқарувчилар билан шартнома тузиш орқали улар томонидан ишлаб чиқарилган маҳсулотларни давлат харидларида сотиш ҳуқуқи берилади.
2026 йил 1 апрелдан бошлаб бюджет буюртмачиларининг давлат харидлари доирасида чет эллик етказиб берувчилар билан бир қаторда маҳаллий ишлаб чиқарувчилар иштирок этганда уларга нисбатан таклиф этилган энг паст импорт товарларининг нархидан қуйидаги миқдорларда нарх преференцияси берилади:
3та ва ундан ортиқ маҳаллий ишлаб чиқарувчи иштирок этган тақдирда 15 фоиз;
2та маҳаллий ишлаб чиқарувчи иштирок этган тақдирда 12 фоиз;
1 та маҳаллий ишлаб чиқарувчи иштирок этган тақдирда 8 фоиз миқдорида.
Электрон-скоринг тизими ишга туширилади
Фармонга кўра, 2026 йил 1 сентябрдан давлат харидлари махсус ахборот порталида харид қилиш тартиб-таомиллари иштирокчисининг фаолиятини идоралараро ахборот алмашинуви орқали автоматик тарзда баҳолаш имконини берувчи электрон-скоринг тизими ишга туширилади.
Бунда электрон-скоринг тизими воситасида иштирокчиларнинг давлат харидларидаги «юқори», «ўрта», «паст» ва «энг паст» ишончлилик даражалари берилади.
Юқоридагилар асосида қуйидаги рағбатлантириш чоралари кўрилади:
«юқори» ишончлилик даражасига эга иштирокчилар учун закалат тўлаш талаб этилмайди;
энг яхши таклифларни танлаш ва тендер савдоларида иштирокчилар томонидан тақдим этилган таклифларга ишончлилик даражасига мутаносиб равишда қўшимча балл берилади;
давлат харидлари соҳасида «энг фаол тадбиркор» танловида давлат харидларидаги ишончлилик даражаси «юқори» бўлган давлат харидлари иштирокчиларининг номзодлари қўллаб-қувватланади.
Шунингдек, давлат харидларидаги ишончлилик даражаси «паст» ва «энг паст» бўлган иштирокчиларнинг:
харид қилиш тартиб-таомилларида иштирок этишига рухсат этиладиган давлат харидларининг юқори қийматига нисбатан меъёрлар белгиланади;
бепул онлайн ўқув курслари орқали малакасини ошириш амалиёти йўлга қўйилади.
