Сержио Гор Тошкентда: у Саида Мирзиёева билан учрашди

АҚШнинг Жанубий ва Марказий Осиё бўйича махсус элчиси, элчи Сержио Гор Ўзбекистонга келди. Бу ҳақда АҚШнинг Тошкентдаги элчихонаси хабар берди.

Сержио Гор Тошкентга ташриф буюриб, Президент Администрацияси раҳбари Саида Мирзиёева билан учрашди. Бошқа кўплаб мавзулар қаторида улар икки давлат ўртасида тижорат дипломатиясини кучайтириш масалаларини муҳокама қилган.

Шунингдек, Америка-Ўзбекистон ишбилармонлар ва инвестициялар кенгашининг биринчи очилиш йиғилиши бўлиб ўтган.

Ўтган йил ноябрда Сержио Гор ва Саида Мирзиёева янги ташкил этилган АҚШ–Ўзбекистон ишбилармонлик ва инвестиция кенгашининг ҳамраислари этиб тайинланган.

Горнинг Марказий Осиёга ташрифи

АҚШнинг Жанубий ва Марказий Осиё бўйича махсус элчиси, элчи Сержио Гор 3-7 феврал кунлари Ўзбекистон ва Қирғизистонда бўлди. Бишкекда элчи Гор «B5+1» Бизнес форумида иштирок этди, унда Қозоғистон, Қирғизистон, Тожикистон, Туркманистон ва Ўзбекистондан (C5 давлатлари) ҳамда АҚШдан юқори даражали бизнес раҳбарлари ва сиёсатчилар билан мулоқот олиб борди.

«Мен сизларга президент Доналд Трамп номидан оддий хабарни етказмоқчиман: Қўшма Штатлар ҳамкорлик қилишни истайди ва минтақани ташқи сиёсатда устувор йўналиш сифатида белгилайди», – деди Гор Бишкекда.

Элчининг таъкидлашича, Трамп раҳбарлигида Вашингтон аввалги камчиликларни бартараф этишга қарор қилган. Унинг сўзларига кўра, АҚШ технологиялар, сармоя ва имкониятлар нуқтаи назаридан минтақавий шериклар учун муҳим ҳамкор бўла олади ва бу ўзаро манфаатли жараёндир.

Сержио Гор 2025 йилда Оқ уйда ўтказилган «C5+1» форматидаги саммитни бу сиёсатнинг амалий ифодаси сифатида баҳолади. Ушбу ташаббус бевосита Овал кабинетдан қўллаб-қувватланаётганини ва келгусида ҳам АҚШ ташқи сиёсатининг диққат марказида қолишини алоҳида таъкидлади.

Шунингдек, элчи Бишкекда ўтказиладиган «B5+1» бизнес форумига ҳам тўхталди.

«Мен форумда иштирок этаётган компаниялар рўйхатини кўриб чиқдим ва холисона айтишим мумкинки, бу минтақага ташриф буюрган компанияларнинг энг кенг қамровли рўйхатидир. Келгуси ойлар ва йилларда айнан шундан фойдаланиб иш олиб борамиз. Бу ҳали бошланиши, холос», – деди Сержио Гор.

Биринчи ташриф эмас

Сержио Гор ўтган йил октябр ойида Ўзбекистонга келганди. Ўшанда у президент Шавкат Мирзиёевнинг қабулида ҳам бўлган ва унга АҚШ президенти Доналд Трампнинг саломи ва самимий тилакларини етказган.

Қабул қилинган «йўл харитаси» асосида саноат, молия, муҳим минераллар, энергетика, рақамлаштириш, қишлоқ хўжалиги ва бошқа устувор йўналишлардаги лойиҳаларни илгари суриш долзарблиги таъкидланган. Томонлар хавфсизлик, терроризм ва экстремизм, ноқонуний миграцияга қарши курашиш соҳаларида шерикликни мустаҳкамлаш масалаларини ҳам муҳокама қилган. Глобал ва минтақавий аҳамиятга молик долзарб масалалар юзасидан фикр алмашилган. Ноябрда Вашингтон шаҳрида «С5+1» форматидаги саммитни ўтказиш масалалари кўриб чиқилган.

Сержио Гор ким?

Сержио Гор 1986 йил 30 ноябрда Тошкентда туғилган ва кейинчалик АҚШда таълим олган.

«Times of Malta» ва «OCCRP» аниқлашича, у аслида Серхио Гороховский номи билан 1986 йил 30 ноябрда Тошкентда туғилган экан. Бу маълумот журналистлар қўлига тушган Горнинг Малтадаги кўчмас мулки ҳужжатларида келтирилган. Амалдорнинг адвокати Роберт Гарсон ўз мижозининг Тошкентда туғилганлигини тасдиқлаган. Гор болалигида Малтада камида беш йил яшаган. Хусусан, у 1996 йилдан 1999 йилгача Витториоза шаҳридаги ўғил болалар учун мўлжалланган католик мактабида таълим олган. Кейинчалик (аниқ вақти кўрсатилмаган) Горнинг оиласи АҚШга кўчиб ўтган ва у ерда фуқаролик олган. Журналистларнинг маълумотларига кўра, Гор Трамп маъмуриятида ишлашидан аввал Россияга икки марта ташриф буюрган экан. 2017 йилда у Вашингтондан Москвага учиб келган, Россия пойтахтида бир кун бўлиб, эртаси куни Римга жўнаб кетган. 2018 йилда эса, ўша пайтда республикачи сенатор Ренд Пол билан ҳамкорлик қилаётган Гор, Америка либертариан таҳлил маркази ҳисобланган Катон институти молиялаштирган тадбир доирасида Москвага ташриф буюрган. Бу ташриф «Россия ва АҚШ билан боғлиқ масалаларни ўрганиш, муҳокама қилиш ва таҳлил этиш учун фактларни аниқлаш сафари» деб номланган. Горнинг адвокати унинг Москвага сафарларини амалдорнинг «сайёҳликка ишқибозлиги» билан изоҳлади. Горнинг 2017 йилдаги Россия пойтахтига ташрифини эса у «транзит парвоз» деб атади.

«Axios» нашри Серхио Горни Оқ уйдаги Трампнинг энг таъсирли маслаҳатчиларидан бири сифатида таърифлаган. Гор АҚШ президентининг ўғли кичик Доналд Трамп билан ҳамкорликда Трамп ва унинг ҳамфикрларининг китобларини нашр этувчи «Winning Team Publishing» нашриётини ташкил этган. 2020 йилда Гор Трампнинг сайловолди кампанияси учун маблағ тўплашга масъул бўлган, 2024 йилда эса ҳозирги АҚШ президенти кампаниясига деярли 72 миллион доллар сарфлаган Сиёсий ҳаракатлар қўмитасини тузган. Оқ уйда кадрлар бўйича директор лавозимини эгаллагач, Гор Трамп маъмурияти ходимларининг содиқлигини текшириш тизимини жорий этган.

Кейинчалик Трамп уни АҚШнинг Ҳиндистондаги элчиси ва Жанубий ва Марказий Осиё бўйича махсус вакил этиб тайинлади.