Шуҳрат Холмуҳамедов: Туркия Ўзбекистон армиясини модернизация қилишда муҳим рол ўйнайди
Анқарада Ўзбекистон ва Туркия мудофаа вазирлари 2026 йилга мўлжалланган ҳарбий ҳамкорлик режасини имзолади.
Ўзбекистон мудофаа вазири Шуҳрат Холмуҳамедов ва Туркия миллий мудофаа вазири Яшар Гюлер Анқара шаҳрида учрашиб, икки мамлакат ўртасидаги ҳарбий алоқаларни мустаҳкамлашга қаратилган муҳим ҳужжатларни имзолади. Бу ҳақда Мудофаа вазирлиги матбуот хизмати хабар берди.
Қайд этилишича, яккама-якка ва делегациялар даражасидаги учрашувларда минтақавий хавфсизлик ва мудофаа саноати соҳасидаги ҳамкорлик масалалари муҳокама қилинган.
Ҳарбий салоҳиятни оширишга қаратилган келишувлар
Учрашувдан сўнг икки мамлакат ўртасидаги ҳарбий салоҳият ва мувофиқлаштириш масалаларига қаратилган муҳим ҳужжатлар имзоланган.
Расмий маросимдан сўнг Туркия миллий мудофаа вазири Яшар Гюлер Ўзбекистон билан мудофаа соҳасидаги муносабатлар стратегик шериклик даражасига кўтарилаётганини таъкидлаган.
Генерал-лейтенант Шуҳрат Холмуҳамедов ҳамкасбининг сўзларини тасдиқлаб, Туркиянинг мудофаа саноати ва ҳарбий тайёргарлик тажрибаси Ўзбекистон армиясини модернизация қилиш, ҳарбий салоҳиятни ҳар жиҳатдан янада мустаҳкамлашда муҳим рол ўйнашини айтган.
2026 йилга мўлжалланган ҳамкорлик режалари
Янги имзоланган ҳамкорлик режасига кўра, 2026 йил давомида икки давлат ҳарбий бўлинмалари иштирокида қўшма ўқув машғулотларини ўтказиш, соҳа мутахассислари ва кадрлар алмашинувини фаоллаштириш ҳамда техник ҳамкорликни кучайтириш кўзда тутилган.
Шунингдек, ҳарбий тиббиёт йўналишидаги алоқаларни ривожлантириш мақсадида ҳарбий шифокорлар малакасини ошириш, госпиталларни бошқариш ва ҳарбий-тиббий технологияларни ўзлаштириш бўйича алоҳида келишувларга эришилган.
