Сурия саройида қуролли тўқнашув: Аҳмад аш-Шаръага қарата ўқ узилган
Сурия президенти Аҳмад аш-Шаръа ва «Ҳайъат таҳрир аш-Шом» ичидаги радикал гуруҳ ўртасидаги баҳс қуролли тўқнашувга айланди, президент тан жароҳатлари билан қутулди.
Сурияда ҳокимиятни қайта шакллантириш жараёни давом этаётган бир пайтда мамлакат раҳбарияти ичида жиддий инқироз юзага келди. Президент Аҳмад аш-Шаръа билан Ҳайъат таҳрир аш-Шом таркибидаги радикал қанот ўртасидаги баҳс йиғилиш вақтида қуролли тўқнашувга айлангани хабар қилинмоқда.
Маълумотларга кўра, радикал гуруҳ Шаръанинг сиёсий йўналишини «ҳаддан зиёд юмшоқ» деб баҳолаган. Томонлар ўртасидаги тортишув тез орада назоратдан чиқиб, қурол ишлатилган. Тўқнашув Сурия президентлик саройи ҳудудида содир бўлгани вазиятнинг нақадар хавфли эканини кўрсатди.
Оқибатда ҲТШнинг собиқ муфтийси оғир яраланган. Унинг аҳволи ҳақида расмий маълумотлар чекланган, аммо маҳаллий манбалар жароҳат жуда жиддий эканини таъкидламоқда. Бу ҳолат Сурия ичидаги куч мувозанати ва исломий гуруҳлар ўртасидаги зиддиятларни янада очиқ намоён қилди.
Тўқнашув пайтида президент Шаръа ҳаётини шахсий қўриқчиси сақлаб қолгани айтилмоқда. Хавфли вазиятда қўриқчи ўз танаси билан президентни ёпиб, уни ўқлардан ҳимоя қилган. Натижада Шаръа енгил тан жароҳатлари билан қутулган.
Ҳодисадан сўнг президент оғир яралангани ҳақида тарқалган хабарларга жавобан видеомурожаат билан чиқиб, бу маълумотларни рад этди. Шу билан бирга, «Jerusalem Post» нашри Эрон Шаръага қарши суиқасд режалаштираётгани ҳақида даъво қилди. Нашрга кўра, Исроил томони бу хавф ҳақида Дамашқни олдиндан огоҳлантирган.
