ТИВ Эрондаги ўзбекистонликларга мурожаат қилди
Бутун Эрон бўйлаб икки ҳафтадан ортиқ давом этаётган норозилик намойишлари вақтида 2000 га яқин киши ҳалок бўлган.
Эронда давом этаётган оммавий намойишлар муносабати билан Ўзбекистоннинг Теҳрон шаҳридаги элчихонаси ватандошлардан шахсий хавфсизлик қоидаларига қатъий риоя қилишни ва одамлар гавжум жойлардан узоқроқ бўлишни сўрамоқда.
Аҳрор Бурхоновга кўра, ТИВ Эрондаги вазиятни диққат билан кузатиб бормоқда. Ўзбекистон Республикасининг Эрондаги Элчихонаси маълумотларига кўра, ҳозирга қадар намойишлар давомида жабрланганлар орасида Ўзбекистон фуқаролари қайд этилмаган.
«Шу муносабат билан, Эронда бўлиб турган Ўзбекистон фуқароларидан митинг ва намойишларда иштирок этмасликни, одамлар кўп тўпланадиган жойлардан йироқ бўлишни ҳамда шахсий хавфсизлик чораларига қатъий риоя этишни сўраб қоламиз», - дейилади ТИВ баёнотида.
Ўзбекистонликлар зарур ҳолларда Ўзбекистон Республикасининг Теҳрон шаҳридаги Элчихонасига қуйидаги телефон рақамлари орқали мурожаат қилиши мумкин:
+982122299780
+982122832025
Аввалроқ, бутун Эрон бўйлаб икки ҳафтадан ортиқ давом этаётган норозилик намойишлари вақтида 2000 га яқин киши ҳалок бўлгани хабар қилинганди.
Эрондаги норозилик намойишлари ўтган йилнинг 28 декабридан бери давом этмоқда. Улар миллий валюта курсининг пасайиши фонида бошланди ва Эронда оятуллоҳ Али Хаминаи ҳукуматига қарши ва умуман — 1979 йилги инқилобдан кейин Ислом Республикаси ташкил этилганидан бери унинг тарихидаги энг кенг кўламли қарама-қаршиликка айланди. АҚШ президенти Доналд Трамп аввалроқ намойишчиларни қўллаб-қувватлашини билдирган ва аксилҳукумат акциялари иштирокчиларига ёрдам бериш учун Теҳронга босим ўтказишнинг турли, жумладан, ҳарбий вариантларини кўриб чиқаётганини айтган эди. 12 январда норозилик намойишлари фонида Трамп Эрон билан «бизнес юритаётган» мамлакатлардан келадиган товарларга АҚШ томонидан 25 фоизлик бож жорий этилишини эълон қилди. Шундан сўнг, 13 январда Brent нефти нархи икки ойлик максимал даражага етди.
