Тошкент аэропортида 24/7 ишлайдиган тармоқли дўкон очиш режалаштирилмоқда
Uzbekistan Airports Тошкент халқаро аэропортида савдо нуқтаси, вендинг автоматлари, валюта айирбошлаш функциясига эга банкомат ва авиакомпания ваколатхонаси учун бир нечта лотни аукционга қўйди.
Uzbekistan Airports Тошкент халқаро аэропортида бир нечта тижорат объектлари учун жойларни аукционга чиқарди. Бу ҳақда давлат компанияси матбуот хизмати хабар берди.
Халқаро келиш терминалида озиқ-овқат ва кундалик эҳтиёж товарлари сотиладиган тармоқ дўкони очиш учун 139 квадрат метр майдон ажратилмоқда. Жой икки йил муддатга ижарага берилади.
Дўкон очиш учун
Аукционда Ўзбекистонда фаолият юритаётган ва чакана савдо соҳасида камида 5 йиллик тажрибага эга савдо тармоқлари иштирок этиши мумкин. Дўкон сутка давомида ишлаши, нақд ва нақдсиз тўловларни, жумладан Visa ва MasterCard карталарини қабул қилиши керак.
Лотнинг бошланғич ижара нархи йилига 433,68 млн сўмни ташкил этади. Аукцион 2-октябрь куни ўтказилади.
Вендинг автоматлар учун
Шунингдек, аэропортнинг Рухсатномалар бюросида вендинг автоматларини жойлаштириш учун 2 квадрат метр майдон аукционга чиқарилган. Ижарачи уч турдаги ускуна — ичимликлар, қаҳва ва енгил тамаддилар учун автомат ўрнатиши керак.
Автоматлар 24/7 режимида ишлаши ва нақд пул билан бирга Uzcard, Humo, MasterCard ҳамда VISA карталари орқали тўловларни қабул қилиши лозим. Лотнинг бошланғич ижара нархи 36 млн сўм этиб белгиланган.
Банкоматлар учун
Бундан ташқари, Рухсатномалар бюроси биносида валюта айирбошлаш функциясига эга банкомат ўрнатиш учун ҳам лот эълон қилинган. Банкомат сутка давомида ишлаши, QR-код ва NFC орқали контактсиз карталар билан операцияларни амалга ошириш имконини бериши керак.
Мазкур лотда Ўзбекистонда фаолият юритаётган ва камида икки йилдан бери ишлаётган лицензияга эга банклар иштирок этиши мумкин. Бошланғич нарх 12 млн сўм этиб белгиланган. Ушбу аукцион ҳам 2-октябрь куни ўтказилади.
Ваколатхона очиш учун
Яна бир лот орқали халқаро жўнаб кетиш терминалининг учинчи қаватидаги 25 квадрат метр офис майдони авиакомпания ваколатхонасини очиш учун таклиф этилмоқда.
Ваколатхона парвозларни ташкил этиш ва уларга хизмат кўрсатиш, шунингдек, йўловчиларга кўмаклашиш учун фойдаланилиши керак. Жой бир йилга берилади ва кейинчалик ижара муддатини узайтириш имконияти мавжуд.
Аукционда амалдаги лицензияга эга, қайта ташкил этиш, тугатиш ёки банкротлик жараёнида бўлмаган ҳамда оффшор ҳудудларда рўйхатдан ўтмаган авиакомпаниялар иштирок этиши мумкин.
Ушбу лот бўйича аукцион 9-октябрь куни ўтказилади. Бошланғич нарх 300 млн сўмни ташкил қилади.
