Трамп Эпштейн иши бўйича суратларни эълон қилишга қарши чиқди

АҚШ президенти Доналд Трамп Жеффри Эпштейн иши доирасида тергов материалларидаги фотосуратларни оммавий намойиш этишга қатъий қарши эканини билдирди. Флоридада журналистлар саволларига жавоб берар экан, у бундай қадам адолат принципларига зид бўлиши ва айрим шахсларга нисбатан асоссиз гумонларни кучайтиришини таъкидлади.

Оқ уй раҳбари Эпштейн билан боғлиқ ҳужжатлардаги суратларни ҳамманинг кўзи олдига қўйишни «жуда нотўғри» деб баҳолади. У молиячининг вояга етмаганларга нисбатан жинсий зўравонлик ва фоҳишалик тармоғини ташкил этишда айбланганини эслатиб ўтди.

Трамп АҚШнинг собиқ президенти Билл Клинтонни алоҳида тилга олиб, унга нисбатан шахсий хайрихоҳлиги борлигини билдирди.

«Билл Клинтоннинг суратлари намойиш этилаётгани менга ёқмаяпти. Бошқа одамларнинг ҳам расмлари кўрсатилиши ёқмаяпти. Назаримда, бу жуда ёмон», - деди АҚШ президенти Эпштейн иши ҳужжатларига бундай тасвирлар киритилганига изоҳ бериб.

У ишда қандайдир тарзда номи тилга олинган шахсларнинг суратларини оммага кўрсатилишига қарши. Трампнинг таъкидлашича, уларнинг баъзилари Эпштейннинг жиноий фаолиятидан бехабар ҳолда у билан мулоқотда бўлган бўлиши мумкин.

Молиячи Жеффри Эпштейн ўнлаб вояга етмаган қизларни жинсий эксплутация қилишда айбланган. Тергов маълумотларига кўра, уларнинг энг кичиги 14 ёшда бўлган. Шунингдек, у кенг қамровли фоҳишабозлик тармоғини ташкил этишда гумон қилинган. Эпштейннинг 2019 йил 10 августда Ню-Йоркдаги камерада жасади топилган.

Эпштейн иши бўйича аввалроқ эълон қилинган суд ҳужжатларида бир қатор таниқли сиёсатчилар, жамоат арбоблари ва шоу-бизнес вакилларининг исмлари қайд этилган эди.

Улар орасида — шаҳзода Эндрю, Доналд Трамп, Билл Клинтон, Исроилнинг собиқ бош вазири Эхуд Барак, АҚШнинг собиқ вице-президенти Алберт Гор, актёр Кевин Спейси, хонанда Майкл Жексон, иллюзионист Дэвид Копперфилд, адвокат Алан Дершовиц ва Ню-Мексико штатининг собиқ губернатори Билл Ричардсон бор.

АҚШ Федерал қидирув бюроси Адлия вазирлиги билан биргаликда олиб борилган тергов якунларига кўра, таниқли шахслардан иборат «мижозлар рўйхати» мавжудлиги ҳақида далиллар топилмаганини маълум қилди.

Маҳкама Эпштейн камерада ўз жонига қасд қилган деган хулосага келди ва сиёсатчилар, машҳурлар ҳамда тадбиркорларнинг алоқадорлигини яшириш мақсадида у ўлдирилган деган версияни рад этди.

Америкалик журналист Такер Карлсон аввалроқ Эпштейн «Исроил учун ишлаганини» ва бу гўёки Вашингтонда ҳамма биладиган факт эканини таъкидлаган эди, гарчи расман бундай баёнотлар тасдиқланмаган бўлса-да.

The Wall Street Journal нашрининг хабар беришича, Эпштейннинг дўсти Гислен Максвелл гўёки унинг танишларидан Эпштейннинг 50 ёшлик юбилейига табрикнома ёзишни илтимос қилган. Нашр маълумотларига кўра, бундай мактуб муаллифларидан бири Доналд Трамп бўлган.