Трамп Эронга қарши кенг кўламли ҳарбий операция бошланганини айтди

АҚШ президенти Доналд Трамп «Тruth Social» орқали эълон қилган видеомурожаатида Вашингтон Эронга қарши кенг кўламли ҳарбий операция бошлаганини расман тасдиқлади. Унинг таъкидлашича, амалиётнинг асосий мақсади Эроннинг ракета салоҳияти ва ҳарбий саноатини издан чиқаришдан иборат.

«Биз уларнинг ракеталарини йўқ қиламиз ва ракета саноатини ер билан яксон қиламиз», деди Трамп.

Шунингдек, Трамп Эрон раҳбариятини қаттиқ танқид қилиб, «Улар ўта шафқатсиз, жуда қаттиққўл ва даҳшатли одамлар гуруҳи. Уларнинг таҳдидли фаолияти бевосита АҚШга, қўшинларимизга, хориждаги ҳарбий базаларимизга ҳамда бутун дунё бўйлаб иттифоқчиларимизга хавф туғдиради», деди.

Associated Press маълумотига кўра, ҳарбий зарбада нишонлардан бири Эрон олий раҳбари Али Хоманаийнинг офиси бўлган. Reuters эса ҳукумат вакилига таяниб, Хоманаий хавфсиз жойга кўчирилганини хабар қилган. Шунингдек, Эрон разведка биноси, президентлик мажмуаси ва Теҳрон аэропорти ҳам зарба остида қолгани маълум қилинган

Трампнинг баёноти ядро дастури бўйича музокаралар кескинлашган бир пайтга тўғри келди. Охирги ойларда АҚШ минтақада ҳарбий кучларини кучайтириб, Эронга босимни оширган эди. Расмий Вашингтон Теҳрондан уран бойитишни чеклаш ва ракета дастурини қисқартиришни талаб қилиб келмоқда.

Ҳозирча Эрон расмийлари Трамп баёнотига жавоб бергани йўқ.