Трамп Эронни огоҳлантирди: намойишчиларга ўқ узилса, кучли жавоб зарбаси берилади

АҚШ президенти Доналд Трамп Ирондаги намойишлар давомида фуқаролар ўлдирилса, Қўшма Штатлар «жуда кучли зарба» жавоб беришга тайёр эканини маълум қилди. У бу ҳақда Truth Social тармоғидаги баёнотида ёзди.

Трампнинг таъкидлашича, ҳозиргача айрим қурбонлар оммани назорат қилишдаги муаммолар ортидан юзага келган босимлар сабаб ҳалок бўлган. Шу билан бирга, у кимнидир аниқ айбдор деб кўрсатиш қийин эканини қайд этди, бироқ вазият АҚШ томонидан жуда яқиндан кузатилаётганини билдирди.

АҚШ раҳбари Эрондаги норозилик намойишлари ҳақида радиожурналист Ҳю Ҳюиттга берган интервьюсида ҳам кескин огоҳлантириш қилди. Унинг сўзларига кўра, агар Эрон ҳукумати намойишчиларни ўлдиришга ўтса, Вашингтон уларга «ҳозиргача берилган зарбалардан ҳам кучлироқ» жавоб қайтаради.

Трамп Эрондаги ҳозирги вазиятни оғир деб баҳолади. У мамлакатда ёқилғи, сув ва асосий ресурслар етишмаётганини, давлат маблағлари эса йиллар давомида терроризм ва самарасиз йўналишларга сарфланганини айтди. Шу билан бирга, у эрон халқини «буюк халқ» деб атаб, улар эркин яшашга ҳақли эканини таъкидлади.

АҚШ президенти Эрон халқига эркинликка эришишда ёрдам берилиш-берилмаслиги ҳақидаги саволга аниқ жавоб бермади, аммо вазият ривожини кузатишини билдирди. Унинг сўзларига кўра, ҳозирги пайтда Эрон раҳбарияти тарихда ҳеч қачон бўлмаган даражада жиддий муаммоларга дуч келган.

Маълумот ўрнида: Эрондаги намойишлар 28 декабрдан бери давом этмоқда. Илк чиқишлар Теҳрондаги марказий бозорда бошланган бўлиб, уларга миллий валюта қадрсизланиши ва нархларнинг кескин ошиши сабаб бўлган.

Кейинчалик норозилик акциялари мамлакатнинг қатор ҳудудларига ёйилди. Жумладан, мамлакатнинг иккинчи катта шаҳри Машҳадда намойишчилар Эрон миллий байроғини тушириб, парчалагани акс этган тасвирлар тарқалди.