Трамп: Ҳиндистон энди Эрондан эмас, Венесуэладан нефт сотиб олади
Трампнинг айтишича, Ҳиндистон Венесуэла нефтини Эронники ўрнига сотиб олади. Вашингтон Ню-Деҳлигa тез орада Венесуэлада нефт харид қилишни қайтадан бошлаш мумкин бўлишини билдирган.
Ҳиндистон Венесуэла нефтини Эронники ўрнига сотиб олади. Бу ҳақда АҚШ президенти Доналд Трамп кеча, 31 январ куни Флоридадан Вашингтонга кетаётганда «Air Force One» самолётида маълум қилди.
«Биз бу келишувни, келишув концепциясини аллақачон якунладик», — деди АҚШ президенти.
«Reuters» агентлиги маълумотларига кўра, бу Ҳиндистонга Россиядан нефт импорт қилишни алмаштиришга ёрдам бериш мақсадида қилинмоқда.
Трамп, шунингдек, Хитой ҳам АҚШ билан Венесуэла нефтини сотиб олиш бўйича келишув қила олиши мумкинлигини билдирди.
АҚШ назорати остида Венесуэла нефтини сотиш
Венесуэла нефтини қайтадан сотиш АҚШнинг ҳарбий операциясидан кейин содир бўлди, январ бошида Венесуэланинг собиқ президенти Николас Мадуро қўлга олинган эди. АҚШ назорати остида экспорт қайта бошланганидан сўнг, манбаларга кўра, Венесуэланинг «PDVSA» давлат нефт ва газ компанияси ишлаб чиқаришни кўпайтиришни бошлаган.
АҚШ аллақачон Каракас билан янги келишув доирасида Венесуэла нефтини сотишни бошлади. Биринчи келишувлардан олинган тахминан 500 млн долларлик даромад АҚШ маъмурияти назоратидаги банк ҳисобларига жойлаштирилмоқда. Келишувнинг умумий ҳажми 2 млрд доллар деб баҳоланмоқда, асосий ҳисоб эса Қатарда очилган ва у ҳисоб-китоблар учун нейтрал майдон сифатида хизмат қилади.
29 январ куни Венесуэла парламенти АҚШ талабларига мувофиқ нефт соҳасини хусусий инвесторлар учун очиш тўғрисидаги қонунни қабул қилди.
