Трамп Макрондан келган SMS-хабарлар скриншотини тармоққа жойлаштирди

АҚШ президенти Доналд Трамп 20 январ куни ўзининг Truth Social ижтимоий тармоғида Франция президенти Эммануэл Макрон томонидан унга юборилгани айтилаётган хабарлар скриншотини эълон қилди.

«Президент Макрондан Президент Трампга. Дўстим, биз Сурия бўйича бир хил позициядамиз. Эрон масаласида буюк ишларни амалга оширишимиз мумкин. Гренландия масаласида нима қилаётганингизни тушунмаяпман. Келинг, буюк ишларни қилишга ҳаракат қилайлик: 1) Мен Давосдан кейин пайшанба куни тушдан кейин Парижда G7 учрашувини ташкил қилишим мумкин. Мен украиналиклар, данияликлар, сурияликлар ва россияликларни таклиф қила оламан. 2) АҚШга қайтиб кетишингиздан олдин пайшанба куни Парижда бирга кечки овқат тановул қилайлик», — дейилади инглиз тилида ёзилган хабарда.

Макроннинг атрофидагилари хабарлар ҳақиқийлигини тасдиқламоқда

20 январ куни эрталаб Reuters ва AFP агентликлари бир-биридан мустақил равишда Макроннинг атрофидагиларига таяниб, Трамп томонидан элон қилинган Франция президентининг хабари ҳақиқий эканини ёзди.

AFP манбаси Франция президенти Трампга Парижда Россия иштирокидаги «Катта еттилик» давлатлари вакиллари учрашувини ташкил қилишни таклиф этганини тасдиқлади.

Ўз навбатида, Reuters манбаси Трамп томонидан ошкор қилинган бу хабарлар «Франция президенти омма олдида ҳам, шахсий суҳбатларда ҳам бир хил йўналишда эканини кўрсатишини» таъкидлаган.

Трамп француз виносига 200 фоизлик бож жорий этиш билан таҳдид қилди

Аввалроқ, АҚШ президенти Доналд Трамп Ғазо бўйича Тичлик кенгаши аъзолигини рад этган Франция президенти Эммануэл Макронга нисбатан кескин баёнот бериб, агар Париж кенгашга қўшилмаса, француз вино ва шампанларига 200 фоизлик бож жорий этишини маълум қилган эди.

Франция ҳукумати Трамп таклиф қилаётган «Тинчлик кенгаши» фақат Ғазо масаласи билан чекланмасдан, БМТнинг институционал тамойилларига зид бўлиши мумкинлигидан хавотирда.