Трамп: «Венесуэла АҚШга 50 млн баррелгача нефт етказиб беради»
Трамп Венесуеланинг ўтиш даври ҳукумати АҚШга 30 миллиондан 50 миллион баррелгача юқори сифатли нефт етказиб беришини маълум қилди.
Венесуэланинг ўтиш давридаги ҳокимияти АҚШга 30–50 миллион баррел «юқори сифатли, санкциялар остидаги нефт» етказиб беради. Бу ҳақда АҚШ президенти Доналд Трамп ўзининг Truth Social ижтимоий тармоғида 7 январ, чоршанба куни маълум қилди.
«Бу нефт бозор нархларида сотилади, пуллар Венесуела халқи ва Қўшма Штатларга фойда келтиришини таъминлаш учун АҚШ президенти сифатида уларни назорат қиламан», деди АҚШ раҳбари.
Нефть Венесуэла портларидан денгиз кемалари орқали тўғридан-тўғри АҚШдаги юк тушириш портларига олиб келинади. Трамп бу жараённи «катта молиявий ҳажмларга эга келишув» дея баҳолаган.
Мазкур баёнот АҚШнинг 3 январ куни Венесуэла президенти Николас Мадурони қўлга олиш мақсадидаги ҳарбий операцияси ҳақидаги хабарлардан кейин янгради. Сўнгги ойларда Трамп Каркас ҳукуматини АҚШга йўналтирилган наркотик савдосида иштирок этишда айблаб келмоқда.
Венесуэла эса ўз навбатида Вашингтонни мамлакатнинг табиий ресурсларига эгалик қилиш истагида айблайди. Қайд этилишича, Венесуэла дунёдаги энг йирик аниқланган нефт захираларига эга. 2005 йилгача мамлакат АҚШнинг энг катта нефт таъминотчиларидан бири бўлган.
Бироқ 2007 йилда ўша пайтдаги президент Уго Чавес нефт саноатини миллийлаштириб, хорижий, жумладан америкалик компаниялар мулкини мусодара қилгандан сўнг, икки давлат ўртасидаги энергетик алоқалар кескин ўзгарган эди.
Эслатиб ўтамиз, 3 январ куни АҚШ президенти Доналд Трамп Венесуэлада тун давомида амалга оширилган ҳарбий зарбалар натижасида мамлакат раҳбари Николас Мадуро қўлга олинганини эълон қилган. Унинг айтишича, операция муваффақиятли якунланган ва Мадуро рафиқаси билан бирга Венесуэла ҳудудидан олиб чиқилган.
