Трамп Хитойга қарши «Олтин флот» яратмоқчи — WSJ
АҚШ президенти Доналд Трамп мамлакат ҳарбий денгиз кучларини тубдан янгилайдиган ва «Олтин флот» деб номланадиган янги дастурни бошламоқчи. Лойиҳа Хитойга қарши стратегик устунликни таъминлашга қаратилган.
The Wall Street Journal ёзишича, Доналд Трамп шахсан АҚШ денгиз кучларини модернизация қилиш лойиҳаси билан шуғулланмоқда. Манбаларнинг таъкидлашича, Оқ уй ва Денгиз кучлари қўмондонлиги яқин ҳафталарда янги «Олтин флот» концепциясини муҳокама қилишни бошлаган. Унинг мақсади — Хитой ва бошқа эҳтимолий рақиблар билан рақобатда технологик ва ҳарбий устунликни таъминлаш.
Лойиҳа доирасида флотнинг умумий сонини эмас, балки сифати ва самарадорлигини ошириш режалаштирилмоқда. Янги тизимда катта ҳужумчи кема ва корветлар, шунингдек, 15–20 минг тонна оғирликдаги замонавий жанговар кема лойиҳалари ишлаб чиқилмоқда. Улар гипертовушли ракета тизимлари билан жиҳозланиши кутилмоқда.
«Олтин флот» номланиши Трампнинг бошқа ташаббуслари — «Олтин гумбаз» номли ракетага қарши мудофаа тизими ва инвестиция эвазига тезлаштирилган «Олтин карта» визаси дастури билан уйғунликда. Президентнинг фикрича, янги флот АҚШнинг ҳарбий нуфузини тиклаб, Яқин ва Шарқий Осиёдаги куч мувозанатини сақлаб қолишга ёрдам беради.
АҚШ Денгиз кучларининг собиқ офицери ва лойиҳа муҳокамаларида иштирок этувчи мутахассис Брайан Кларкнинг WSJ’га маълум қилишича, янги концепция 280–300 та кема ва кўп сонли дрон сув кемаларини қамраб олади. Улар жанговар операцияларда ёрдамчи куч сифатида фаолият юритиши режалаштирилган.
АҚШ расмийларининн таъкидлашича, «Олтин флот» лойиҳаси мамлакат мудофаа салоҳиятини ошириш билан бирга, Хитой билан баҳсли денгиз ҳудудларида куч мувозанатини таъминлашни кўзлайди.
