Туб ростдан яқинми? Том Ли «криптоқиш» қачон тугашини айтди

«Fundstrat» таҳлил компанияси раҳбари ва «BitMine Immersion Technologies» директорлар кенгаши раиси Том Ли криптобозордаги ҳозирги пасайиш якунланиш босқичида эканини билдирди. Унинг фикрича, «криптоқиш ё аллақачон тугаган, ёки энг кечи билан апрелда тугайди».

Уолл-стритда аниқ прогнозлари билан танилган таҳлилчи криптобозор якуний коррекция босқичида эканини инвесторлар кайфияти ва техник индикаторлар тасдиқлаётганини қайд этди. Унингча, бозордаги ўта салбий фон одатда паст нуқта яқинлашганидан далолат беради.

Том Ли ҳисоб-китобларига кўра, биткоин учун эҳтимолий паст чегара 60 минг доллар атрофида, Ethereum учун эса 1890 доллар даражасида шаклланиши мумкин. Бироқ у қисқа муддатли яна бир пасайиш эҳтимолини ҳам истисно қилмади.

Биткоиннинг паст нуқтаси

Ли бозор динамикаси ва бошқа рискли активлар ўртасидаги фарқни ликвидликнинг олтинга йўналиши билан изоҳлади. Унинг таъкидлашича, дунёдаги олтин қиймати 40 трлн долларга етган ва бу S&P 500 индекси капитализацияси билан деярли тенглашган.

Инвесторлар фиат пул тизими барқарорлигига оид хавотирлар туфайли олтинга фаол ўтмоқда. Рақамли активлар эса ҳозирча молиявий тизимнинг бир қисми сифатида қабул қилинаётгани учун босим остида қолмоқда.

2026 йил учун прогноз

Том Ли 2026 йилда рискли активлар ўсишига ишонч билдирди. Унинг оптимизми АҚШда пул-кредит сиёсати юмшаши мумкинлиги билан боғлиқ. Федерал захира тизимининг янги раҳбари Кевин Уорш «кабутар» позицияни эгаллаши ва ставкаларни пасайтиришга мойил бўлиши эҳтимоли қайд этилди.

Шунингдек, АҚШ иқтисодиётида уч йиллик пасайишдан сўнг фаоллик ошгани ва инфляция пандемиядан олдинги даражаларга яқинлашаётгани бозор учун ижобий омил сифатида баҳоланди.