Умеров Зеленскийга америкаликлар билан ўтказилган музокаралар бўйича ҳисобот берди
Урушни тугатиш ва хавфсизлик кафолатлари бўйича янги ҳужжатлар тайёрланди.
Украина Миллий хавфсизлик ва мудофаа кенгаши (МХМК) котиби Рустем Умеров узоқ давом этган сафардан сўнг Киевга қайтди ва Бош штаб бошлиғи Андрей Гнатов билан биргаликда Украина президенти Воладимир Зеленскийга АҚШ билан ўтказилган музокаралар ҳақида ҳисобот берди. Бу ҳақда Зеленский ўзининг Телеграм-каналида маълум қилди.
Унинг сўзларига кўра, аллақачон бир нечта ҳужжат лойиҳалари тайёрланган.
«Хусусан, Украина учун хавфсизлик кафолатлари, тикланиш ва ушбу урушни тугатишнинг асосий негизлари бўйича ҳужжатлар бор. Бугунги кунда бандлар шундай қайд этилдики, бу урушни ҳақиқатда тугатиш ва Россиянинг навбатдаги босқинини олдини олиш вазифасига мос келади. Музокаралар ва учрашувларнинг ҳар бир раунди Украина манфаатлари таъминланишига хизмат қилмоқда ва биз бу ишни айнан шундай конструктив тарзда давом эттирамиз», - деб ёзди Зеленский.
Украина президенти Вашингтон билан мулоқот давом этишини ва Москвага босим кучайишини кутаётганини таъкидлади.
Аввалроқ, Украина ОАВлари Умеров АҚШда нафақат тинчлик музокараларини олиб боргани, балки ФҚБ раҳбари Кэш Пател билан ҳам учрашгани ҳақида хабар берган эди. ОАВнинг ёзишича, бу тадбиркор Тимур Миндич иши билан боғлиқ бўлиб, унда Умеров ҳам тилга олинган.
Украинадаги урушни тинч йўл билан ҳал қилиш бўйича Флоридада Америка томони Украина ва Россия делегациялари билан навбатма-навбат ўтказган маслаҳатлашувларга келсак, ғарб матбуоти маълумотларига кўра, АҚШ ва Россия ўртасидаги музокаралар ҳудудий чегаралар ва хавфсизлик кафолатлари масаласида боши берк кўчага кириб қолган.
