«Хуфиёна флот» танкерлари оммавий равишда йўналишини ўзгартирмоқда

Пентагон Венесуэла атрофида олиб борилаётган денгиз назорати самара бераётганини маълум қилди. Сўнгги сутка ичида камида етти танкер Кариб денгизида ўз йўналишини ўзгартириб, ҳаракатни тўхтатган ёки ортга қайтган.

Бу ҳақда Пентагон матбуот котиби Шон Парнелл «X» ижтимоий тармоғидаги саҳифасида баёнот берди. Унинг сўзларига кўра, АҚШнинг Венесуэла нефтини санкциялардан четлаб ташишда иштирок этаётган «хуфиёна флот» танкерларига қарши қатъий позицияси аниқ натижа бермоқда.

Парнелл Вашингтон бундай кемаларнинг барчасини ушлаб қолиш ёки йўлини тўсиш ниятида эканини таъкидлади. Унинг фикрича, танкер экипажлари хавфни яхши англамоқда ва Америка ҳарбий-денгиз кучлари билан тўғридан тўғри тўқнашувдан қочишни афзал кўрмоқда.

«Бизнинг яримшарда қонунбузарлик авж оладиган давр якунланди. Бу Президент Доналд Трамп ва мудофаа раҳбарияти олиб бораётган сиёсат натижасидир», — деб ёзган Парнелл.

Сўнгги кунларда АҚШ ҳарбийлари Венесуэла нефтини ташиётган икки танкерни ушлаб қолган. Хусусан, яқинда «Olina» номли танкер тўхтатилди. Кема Венесуэладан чиқиб кетиб, таъқибдан қочишга уринган, аммо Америка кучлари томонидан қўлга олинган.

Бу ҳаракатлар АҚШнинг Венесуэладан нефть етказиб бериш йўлларини қаттиқ назорат қилиш ва санкцияларни айланиб ўтиш амалиётини тўлиқ тўхтатишга қаратилган кенг қамровли кампаниясининг бир қисми ҳисобланади.

Маълумотларга кўра, Венесуэла нефтини ташиётган айрим танкерлар Россия билан боғлиқ «хуфиёна флот» таркибига киради, айрим кемалар эса Россия байроғи остида ҳаракат қилмоқда. АҚШ томони бу фаолиятни халқаро хавфсизликка таҳдид сифатида баҳоламоқда.