Зеленский Путин билан Москвада учрашиш таклифига жавоб қайтарди
23–24 январ кунлари Абу-Дабида бўлиб ўтган уч томонлама музокаралардан сўнг, Россия президенти ёрдамчиси Юрий Ушаков уни Москвага таклиф қилган эди.
Украина президенти Воладимир Зеленский Юрий Ушаковнинг Россия Президенти Владимир Путин билан Москвада учрашув ўтказиш ҳақидаги таклифига изоҳ берди. Бу ҳақда РБК-Украина хабар берди.
«Сўзсиз, менинг Москвада Путин билан учрашишимнинг иложи йўқ. Бу худди Путин билан Киевда учрашишдек гап. Мен ҳам уни Киевга таклиф қилишим мумкин, майли келсин. Агар журъат қилса, албатта, уни оммавий равишда таклиф қиламан», - деди Зеленский журналистлар саволларига жавоб берар экан.
Украина президенти, агар бундай музокаралар урушни тугатишга ёрдам берса, етакчилар даражасидаги ҳар қандай форматдаги учрашувга тайёрлигини таъкидлади.
«Бундай учрашувни Москва ва Беларусда ўтказиш «шунчаки имконсиз ва бу мутлақо тушунарли — чунки бу давлатларнинг бири бизга қарши уруш бошлаган ва олиб бораётган, бизни ўлдираётган агрессор бўлса, бошқаси ушбу ҳаракатларда унинг шеригидир», - деди Зеленский.
Россия президенти Владимир Путин 2025 йил кузида Зеленскийга шахсий учрашув учун Москвага келишни таклиф қилган эди. Ўшанда ҳам Украина президенти Путиннинг ўзи Киевга келиши мумкинлигини айтиб, рад жавобини берган.
Таклиф
2026 йил 23–24 январ кунлари Абу-Дабида бўлиб ўтган уч томонлама музокаралардан сўнг, Россия президенти ёрдамчиси Юрий Ушаков яна худди шундай таклиф билан чиқди.
Александр Лукашенко эса Беларус ўз ҳудудида Россия ва Украина етакчилари ўртасида музокаралар ўтказишга тайёрлигини бир неча бор таъкидлаган.
Россия-Украина уруши
Украинадаги уруш 2014 йилда Қримнинг Россия томонидан аннексия қилиниши ва мамлакат шарқидаги Донбасс минтақасида бошланган қуролли низолар билан илдиз отган бўлиб, 2022 йил 24 феврал куни Россия қўшинларининг кенг кўламли бостириб кириши натижасида энг кескин фазасига чиқди. 2026 йилга келиб, Россия Украина ҳудудининг тахминан 17-20 фоизини ишғол қилмоқда, аммо ҳужумлари секин кечмоқда – масалан, 2024-2025 йилларда ҳар куни ўртача 15-70 метр ҳаракат қилган – ва ҳар икки томон ҳам улкан йўқотишларга дуч келмоқда: Россия 1,2 миллиондан ортиқ ҳарбий йўқотишга учраган, умумий ҳисобда 2 миллионга етиши мумкин. Ҳозирда тинчлик музокаралари давом этмоқда, АҚШ Украинага хавфсизлик кафолатларини таклиф қилиб, Донецк ва Луганскнинг қолган қисмини Россияга беришни талаб қиляпти, Украина рози эмас.
