Зеленский: «Урушнинг тугаш санаси хавфсизлик кафолатларига боғлиқ»

Украина президенти Володимир Зеленскийнинг айтишича, урушнинг аниқ якунланиш санасини белгилаш тўғридан тўғри хавфсизлик кафолатларининг мазмуни ва ишончлилигига боғлиқ. У таъкидлашича, гап фақат Украина ҳудудидаги уруш ҳақида эмас, балки бутун Европа хавфсизлигига таҳдид солаётган кенг қамровли инқироз ҳақида кетмоқда. Шу сабабли ҳар қандай тинчлик келишуви аниқ, ҳуқуқий жиҳатдан мустаҳкам ва амалий кафолатларга таяниш лозим. Унинг сўзларини «The Telegraph» нашри келтирмоқда.

Зеленскийнинг сўзларига кўра, Украина учун энг муҳим йўналиш — АҚШ билан икки томонлама хавфсизлик кафолатлари ҳисобланади. Президент маълум қилишича, тегишли ҳужжат тўлиқ тайёр ҳолатга келтирилган. Энди Киев Вашингтон томонидан уни имзолаш учун аниқ сана ва жой белгиланишини кутмоқда.

«Ҳужжат 100 фоиз тайёр, биз шерикларимиздан уни имзолаш санаси ва жойи борасида тайёргарликни кутмоқдамиз. Шундан сўнг, келишувларга кўра ҳужжату АҚШ Конгресси ва Украина парламентида ратификация жараёнидан ўтиши лозим», — деди Зеленский.

Президент бу ҳужжатни Украина хавфсизлик архитектурасининг асосий устунларидан бири сифатида баҳолади ва унинг ҳуқуқий мақоми урушдан кейинги барқарорлик учун ҳал қилувчи аҳамиятга эга эканини таъкидлади.

Европа ва иқтисодий кафолатлар

Зеленский хавфсизлик кафолатларининг иккинчи муҳим элементи сифатида Европа томонидан бериладиган мажбуриятларни кўрсатди. Бу, аввало, «Кўнгиллилар коалицияси» доирасидаги кафолатлар ҳамда Украина келажакда Европа Иттифоқига аъзо бўлиши билан боғлиқ сиёсий ва ҳарбий қўллаб-қувватлаш механизмларидир.

Украина президентининг таъкидлашича, Европа йўналиши стратегик нуқтаи назардан АҚШ билан ҳамкорликни тўлдирувчи омил ҳисобланади.

Бундан ташқари, у иқтисодий хавфсизлик кафолатларига алоҳида урғу берди. Зеленскийга кўра, барқарор иқтисодий муҳитсиз ва узоқ муддатли сармоя кафолатларисиз тинчлик шартномаси самарали ишламайди. Шу нуқтаи назардан, евроинтеграция жараёнининг аниқ муддатларга боғланиши муҳим аҳамият касб этади.

Зеленскийнинг маълум қилишича, Украина техник жиҳатдан 2026 йилнинг биринчи ярмида Европа Иттифоқи билан барча музокара кластерларини очишга тайёр бўлади, тўлиқ тайёрлик эса 2027 йилга келиб таъминланади.

Аниқ санага интилиш

Зеленскийнинг сўзларига кўра, Украина урушни якунлаш бўйича келишувда аниқ сана белгилашдан манфаатдор. Бу барча томонлар, жумладан Россия учун ҳам мажбуриятларни ҳуқуқий жиҳатдан мустаҳкамлаб қўяди. Украина президентининг фикрича, аниқ сана ва кафолатлар мавжуд бўлса, келишувни кейинчалик чўзиб юбориш ёки блоклаш имкониятлари кескин камаяди.