5 йиллик «техпаспорт»лар, поезд кечикса қайтариладиган пул ва 661 кг олтин харид қилган Ўзбекистон — 1-апрел дайжести

«Техпаспорт»нинг амал қилиш муддати 2026-йил 1-апрелдан кейин олинган гувоҳномаларга тааллуқли бўлади

Ўзбекистонда 2026-йил 1-апрелдан кейин берилган автомототранспорт воситасини рўйхатдан ўтказиш гувоҳномалари («техпаспорт») учун амал қилиш муддати жорий этилди. Давлат йўл ҳаракати хавфсизлиги хизмати маълум қилишича, энди ушбу ҳужжат 5 йил муддатга берилади ва бу транспорт воситасининг кузов ва двигател каби асосий агрегатларини инвентаризациядан ўтказиш мақсадида амалга оширилмоқда.

Янги тартибга кўра, транспорт эгаси бошқа шахсга вақтинча бошқариш ҳуқуқини берса, қоидабузарлик учун жарима ўша шахс номига расмийлаштирилиши мумкин. Бунинг учун ЙҲХХ органларини ЯИДХП ёки махсус мобил илова орқали олдиндан хабардор қилиш, сўровномани тўлдириш ва уни электрон тарзда тасдиқлаш талаб этилади. Мазкур хизмат учун БҲМнинг 10 фоизи (41,2 минг сўм) миқдорида тўлов ундирилади.

Йил бошидан буён Uzcard карталари инфокиосклар орқали 2 трлн сўмга тўлдирилди

2026-йил январ–феврал ойларида инфокиосклар орқали Uzcard карталарини тўлдириш ҳажми 2 трлн сўмни ташкил этди, бу ўтган йилга нисбатан 5 фоизга кўп. Мамлакат бўйлаб 20 мингдан ортиқ инфокиоск фаолият юритмоқда ва улар орқали аҳоли банк карталарини нақд пул билан тўлдирмоқда. Жами тўлдиришларнинг 94 фоизи «Paynet» инфокиосклари орқали амалга оширилган бўлса-да, унинг бозор улуши қисқарган, «OSON» орқали операциялар эса 47 фоизга ошган.

Банклар кесимида «Xalq banki» карталари 19 фоиз улуш билан етакчи бўлиб қолмоқда, аммо кўрсаткич 3 фоизга пасайган. Шу билан бирга, «Agrobank» карталарига тушумлар 38 фоизга ўсиб, қарийб 190 млрд сўмга етган, «Ipak Yuli banki» улуши эса 10 фоизни ташкил этган. Бозорда янги иштирокчилар ҳам фаоллашиб, «Alif» инфокиосклари орқали тўлдиришларда «Ипотека-банк», «Ipak Yuli banki», «Xalq banki» ва «Milli bank» етакчи ўринларни эгаллаган.

Ўзбекистонликлар 2025-йилда 661 кг олтин қуйма сотиб олди

2025-йилда Ўзбекистон аҳолиси банклар орқали 661 кг ўлчовли олтин қуйма сотиб олди, бу 2024-йилга нисбатан 8 баробарга кўп. Шунингдек, сотилган қуймалар сони 33 939 донани ташкил этиб, 2020–2024 йиллардаги умумий кўрсаткичдан 8,7 фоизга юқори бўлди. Сўнгги икки йилда талаб кескин ошган бўлиб, бу асосан жаҳон бозорида олтин нархининг тарихий максимумларга яқинлашгани билан изоҳланади.

Олтин нархининг ўсиши аҳолининг жамғариш ва инвестиция воситаси сифатида қуймаларга қизиқишини кучайтирган. Шу билан бирга, Марказий банк олтин даромадлилиги жаҳон бозори нархларига боғлиқ эканини ва унинг келгусида барқарор бўлиши кафолатланмаслигини таъкидламоқда. Масалан, 2026-йил март ойида 100 граммлик қуйма нархи 217,3 млн сўмдан 179 млн сўмгача тушган.

Поезд кечикса, пулингиз қайтарилади: Янги компенсация тартиби тафсилотлари

Ўзбекистонда поездлар кечиккан тақдирда йўловчиларга компенсация тўлаш тартиби жорий этилмоқда. Рақобат қўмитасига 2025 йилда 51 та шикоят келиб тушган бўлиб, поездларнинг мунтазам кечикиши қайд этилган. Илгари бундай ҳолатларда («Афросиёб»дан ташқари) компенсация механизми мавжуд эмас эди, шу сабабли Транспорт вазирлиги янги қоидалар ишлаб чиқмоқда.

Янги тартибга кўра, поезд ташувчининг айби билан кечикса, 15–30 дақиқада 15 фоиз, 31–60 дақиқада 25 фоиз, 61–120 дақиқада 50 фоиз ва 121 дақиқадан ортиқ кечикса чипта пулининг 100 фоизи қайтарилади. Ушбу тартиб аввал фақат «Афросиёб» поездларига тегишли бўлган бўлса, энди барча маҳаллий поездларга татбиқ этилади.

ЖЧ-2026ʼнинг барча 48 иштирокчиси маълум: Ўзбекистон рақибини билди

ЖЧ-2026 иштирокчилари тўлиқ аниқланди ва Ўзбекистон миллий жамоасининг «К» гуруҳдаги учинчи рақиби Конго Демократик Республикаси бўлди. Қитъалараро плей-оффда мазкур жамоа қўшимча бўлимларда киритилган гол эвазига ғалаба қозониб, мундиалга йўлланма олди. Шу билан бирга, Ироқ Боливияни 2:1 ҳисобида мағлуб этиб, Осиёдан иштирок этувчи жамоалар сонини тўққизтага

Европа саралашида эса Туркия 24 йиллик танаффусдан сўнг мундиалга йўл олди, Швеция плей-офф орқали иштирок ҳуқуқини қўлга киритди. Италия эса кетма-кет учинчи марта жаҳон чемпионатидан четда қолди, Босния ва Чехия каби жамоалар пеналтилар серияси орқали йўлланмага эришди.