«Алоқабанк» сотилмаслиги мумкин: Fitch Ўзбекистондаги 7 та давлат банки рейтингини яхшилади

Fitch Ratings халқаро рейтинг агентлиги Ўзбекистондаги 7 давлат банкининг рейтинг прогнозларини «барқарор»дан «ижобий»га оширди. Бу ҳақда агентлик расмий сайтида эълон қилинди.

9 та давлат банкининг 7 тасида — «Миллий банк», «Агробанк», «Халқ банки», «БРБ», «Алоқабанк», «МКБанк» ва «Туронбанк»да рейтинг прогнозлари яхшиланди. «Асакабанк» ва «SQB» рейтинги прогнозлари эса ўзгаришсиз қолдирилди.

7 давлат банкида прогнозларнинг яхшиланиши 3 июнь куни Ўзбекистоннинг суверен кредит рейтинги бўйича прогноз ҳам «барқарор»дан «ижобий»га ўзгаргани билан боғлиқ.

Fitch фикрича, бу ҳукуматнинг давлат банкларини қўллаб-қувватлаш имкониятлари кучайганини акс эттиради.

«Миллий банк», «Агробанк», «Халқ банки», «Бизнесни ривожлантириш банки», «Алоқабанк» ва «Микрокредитбанк»нинг узоқ муддатли рейтинглари мамлакат суверен рейтинги билан бир хил — «BB» даражасида тасдиқланган. «Туронбанк» рейтинги эса «BB-» даражасида сақлаб қолинган.

«Туронбанк» рейтинги бир поғона паст экани банкнинг кичик ҳажмли экани, аниқ белгиланган сиёсий ролнинг йўқлиги ва бошқа давлат банкларига нисбатан капитал қўллаб-қувватлаш даражаси пастлиги билан изоҳланади.

Банкларни хусусийлаштириш қандай кечмоқда?

Ҳисоботда «Алоқабанк» ва «Туронбанк»ни хусусийлаштириш режалари ҳам тилга олинган. Fitch йирик давлат банклари сотилмагунча ушбу банкларнинг хусусийлаштирилиши амалга ошмаслигини, бу эса камида 2027 йилгача юз бермаслигини кутмоқда.

Бундан ташқари, агентлик «Алоқабанк» 2025 йилда янги давлат сиёсати вазифаларини олгани сабабли унинг хусусийлаштирилиши эҳтимоли янада пасайганини, ҳатто бу режалар бекор қилиниши мумкинлигини таъкидлаган.

Fitchнинг фикрича, «Алоқабанк» ва «Туронбанк» улушининг катта қисми давлатга тегишли бўлиб қолар экан, уларга давлат томонидан қўллаб-қувватлаш кўрсатилиши керак.

Қайд этилишича, агар Ўзбекистоннинг кредит рейтинги оширилса, давлат банкларининг рейтинглари ҳам юқорилаши мумкин. Аксинча, рейтинг пасайса ёки ҳукуматнинг банкларни қўллаб-қувватлаш қобилияти заифлашса, банкларнинг рейтинглари пасайтирилиши эҳтимоли мавжуд.

Аввалроқ давлат банкларидан «SQB»нинг бир қисми Миллий инвестиция жамғармаси (UzNIF) таркибида IPOга чиқарилганди.

Маълумот учун, Ўзбекистонда энг сўнгги хусусийлаштирилган давлат банки «Пойтахт банк» ҳисобланади. Банк 2024 йилда БААнинг «Bond Investment Limited» компанияси томонидан 10 млн долларга сотиб олинган.