АҚШ «Lukoil»га оид айрим санкцияларни вақтинча юмшатди

АҚШ Молия вазирлиги санкциялар рўйхатига киритилган «Лукойл» компаниясининг Россиядан ташқаридаги ёнилғи қуйиш шохобчаларига вақтинча фаолият юритишга рухсат берди. Умумий лицензия 2026 йил 29 апрелигача амал қилади ва ушбу муддатгача чет элдаги «Lukoil» АЁҚШ билан боғлиқ барча транзакцияларга йўл очади.

АҚШ бу чорани чакана ёнилғи бозорида одатий операцияларни амалга оширувчи истеъмолчилар ҳамда таъминотчиларга зарар етказмаслик мақсадида қабул қилганини маълум қилди. Молия вазирлигига кўра, бир муддатлик юмшатиш орқали хорижий шохобчаларда фаолият тўхтаб қолмаслиги, бир вақтнинг ўзида маблағларнинг Россияга йўналиши чекланиши кўзда тутилган.

Бу қарор «Lukoil» бренди остида АҚШ ва бошқа давлатларда ишлаётган АЁҚШларнинг узлуксиз хизмат кўрсатишини таъминлайди. Шу билан бирга, у Россияга қарши босим камайганини англатмайди, аксинча маблағлар оқимини назорат қилиш орқали санкцияларнинг асосий вазифаси сақланиб қолади.

Шунингдек, лицензия президент Доналд Трамп томонидан октябр ойида киритилган санкцияларнинг айрим бандларини вақтинча тўхтатиб туриши билан аҳамиятлидир. Ушбу қадам декабр бошида Оқ уйнинг Москва билан урушни тўхтатиш шартлари бўйича эҳтимолий музокара уринишлари фонида қўлланди.

Октябр ойида АҚШ ва Буюк Британия «Lukoil» ва «Роснефт» компаниялари ҳамда уларнинг 34 та бўлимларига нисбатан янги чекловлар жорий қилган эди. Франция ахборот агентлигининг ёзишича, бу Трамп маъмурияти томонидан Россияга қаратилган энг кескин санкция пакетларидан бири сифатида баҳоланган.

Россия нефт гигантлари «Lukoil» ва «Роснефт» акциялари янги АҚШ санкциялари ортидан 4 фоизгача пасайган эди.

Эслатиб ўтамиз, АҚШ ва ЕИ жорий этган чекловлар ортидан «Лукойл» ўзининг хориждаги активларини сотиш ниятида эканини расман эълон қилган.