AQSH Rossiyani Tramp tahdidlarini jiddiy qabul qilishga chaqirdi

AQSH prezidenti Donald Trampning Rossiyaga qarshi yangi sanksiyalar qo‘llash ehtimoli haqidagi bayonoti Kreml uchun jiddiy ogohlantirish sifatida baholanmoqda. Bu haqda AQSH Davlat departamenti rasmiy vakili Temmi Bryus ma’lum qildi. Uning ta’kidlashicha, Trampning so‘zlari hech qanday «xafsalasi pir bo‘lgan» holat emas, balki tinchlikka erishish harakatlariga rahbarlik qilgan siyosatchining aniq pozitsiyasidir. Bryusning so‘zlariga ko‘ra, AQSH rahbari qo‘lida «qon to‘kilishini to‘xtatishga yo‘naltirilgan turli vositalar» mavjud va Rossiya bu imkoniyatlarni kamsitmasligi lozim. Ushbu ritorika Trampning Rossiya armiyasi tomonidan Ukrainadagi tinch aholi va infratuzilmaga yo‘l qo‘yilgan massaviy hujumlardan so‘ng qat’iylashdi. 24–26 may kunlari Rossiya tomonidan Ukrainaga qarshi amalga oshirilgan havo hujumlari so‘nggi yillardagi eng keng ko‘lamlisi sifatida qayd etildi. Ukraina Genshtabi ma’lumotlariga ko‘ra, 25 may kuni 300 ta zarba beruvchi dron va 70 ga yaqin turli xildagi raketa, shu jumladan ballistik raketalar qo‘llanilgan. Hujumlar oqibatida kamida 13 nafar tinch fuqaro halok bo‘lgan, ular orasida bolalar ham bor. Tramp Rossiya prezidenti Vladimir Putinni «jihatsiz va odam o‘ldiruvchi» deb atadi hamda Rossiya agar u (Putin) hali ham to‘xtamasa, halokatga yuz tutadi», deb ogohlantirdi. U shuningdek, «Rossiya bilan haqiqiy falokatlar faqat men (Tramp) bo‘lmaganim uchun ro‘y bermadi», degan fikrni ham bildirgan. The Wall Street Journal ma’lumotiga ko‘ra, AQSH prezidenti yaqin kunlarda yangi sanksiyalar paketini e’lon qilishi mumkin. Bu xalqaro muzokaralarda siljish yo‘qligi va Rossiyaning hujumkor harakatlari davom etayotgani bilan bog‘liq. Senator Lindsi Grem esa Rossiya bilan hamkorlik qilayotgan davlatlar uchun 500 foizlik boj joriy etishni taklif qilgan. Uning fikricha, agar Xitoy va Hindiston Rossiya neftini sotib olishdan voz kechsa, «Putinning harbiy mashinalari to‘xtaydi».