АҚШлик инвесторлар UzAuto Motorsʼнинг хусусийлаштириш жараёнила иштирок этади

Трам ва Мирзиёев томонидан эълон қилинган стратегик ҳамкорликка кўра UzAuto Motors хусусийлаштирилиши жараёнида америкалик инвесторлар иштирок этиши ҳам кўзда тутилмоқда. Шунингдек, кейинги уч йилда АҚШдан 5 млрд долларлик авто эҳтиёт қисмлари етказиб беради, дейилади АҚШ Давлат департаментининг расмий пресс релизида.

АҚШнинг Air Products ширкати томонидан Ўзбекистонда 3 млрд долларлик метанол заводи қурилиши ҳам режалаштирилган. Мамлакатда метанолдан олефин, кўмирдан кимёвий маҳсулотлар олиш лойиҳалари тезлаштирилади.

2025 йил 6 ноябрь куни Вашингтонда бўлиб ўтган учрашувда АҚШ президенти Доналд Трамп ва Ўзбекистон президенти Шавкат Мирзиёев икки томонлама ҳамкорликни янги босқичга кўтаришга келишиб олган эди. Учрашув чоғида эълон қилинган қатор йирик келишувлар АҚШ иқтисодиёти, экспорт салоҳияти ва хавфсизлик таъминотида муҳим аҳамият касб этади.

Президент Трамп Ўзбекистоннинг АҚШ саноатига миллиардлаб доллар инвестиция киритишга тайёрлигини олқишлади ва Ш.Мирзиёзевга миннатдорлик билдирди. Хусусан, Тошкент АҚШда қимматбаҳо ва нодир металлар занжирида иштирок этиш, шахталарни ҳамкорликда ривожлантириш, атом энергетикасида ҳамкорлик қилиш ва Boeing самолётларини харид қилишга келишди.

Келишувлар доирасида ўзбекистонликлар томонидан 22 та Boeing 787 Dreamliner самолёти харид қилинади — умумий қиймати 8,5 млрд доллар. Шунингдек, АҚШ Ўзбекистон қишлоқ хўжалиги соҳасига 2 млрд долларлик техникалар, 2 млн тонна соя ва 100 минг тонна пахта етказиб бериш мўлжалланган.

Аввалроқ Ўзбекистон АҚШ фуқаролари учун 2026 йилдан бошлаб 30 кунлик визасиз режим жорий этиши эълон қилинган эди. Қўшимча равишда, АҚШ–Ўзбекистон ҳуқуқ-тартибот идоралари жиноятчиларга қарши маълумот алмашинуви ва ҳудудий хавфсизликни мустаҳкамлаш бўйича ҳамкорликни кучайтиради.