«Аватар» филмининг учинчиси жаҳон прокатида 500 млн доллар тўплади

Жеймс Кэмерон режиссёрлигидаги «Аватар: Олов ва кул» фильмининг жаҳон бўйлаб умумий йиғимлари 500 млн доллардан ошди. Бу ҳақда The Hollywood Reporter нашри маълум қилди. Нашр қайд этишича, фильм 25 декабр — Рождество куни ушбу маррани босиб ўтган.

24 декабр ҳолатига кўра, филмнинг Шимолий Америкадаги ички прокат йиғимлари 129,2 млн долларни ташкил этган. Халқаро бозорларда эса «Аватар»нинг учинчи қисми 353,6 млн доллар даромад келтирган. Шу тариқа, лойиҳа чиқишининг илк кунларидаёқ ярим миллиард долларлик натижа қайд этилди.

Жеймс Кэмерон аввалроқ «Аватар» франшизаси режалари узоқ муддатли эканини таъкидлаган эди. Унинг сўзларига кўра, тўртинчи фильм суратга олиш ишлари ярмига етган, бешинчи қисм сценарийси эса тўлиқ ёзиб бўлинган. Шу билан бирга, режиссёр олтинчи ва еттинчи қисмлар учун ҳам ғоялар мавжудлигини айтган, бироқ келажакда франшизани бошқа кинематографистга топшириш эҳтимолини ҳам истисно қилмаган.

«Аватар: Олов ва кул » — Пандора сайёраси ҳақидаги машҳур кинодостоннинг учинчи қисми ҳисобланади. У 2022 йилда чиққан «Аватар: Сув йўли» филми воқеаларидан бир ҳафта ўтиб бошланади. Янги қисмда Жейк Салли ва Нейтири оиласи янги, тажовузкор «олов ва кул» кланининг қаршилигига дуч келади.

Филм 19 декабрдан прокатга чиққан бўлиб, асосий ролларда Сэм Уортингтон, Зои Салдана, Кейт Уинслет, Сигурни Уивер каби актёрлар яна экранга қайтган.

Аввалроқ бойлиги 1,1 млрд долларга етгани маълум қилинган Жеймс Кэмерон «Терминатор» учун учинчи сценарий ёзаётгани ҳақида ҳам хабар берган эдик.