BMT: «Tinchlik kelishuvi» G‘azodagi o‘limlarni to‘xtata olmadi

BMT Inson huquqlari bo‘yicha oliy komissari boshqarmasining rasmiy vakili Marta Urtado Gomes o‘t ochishni to‘xtatish rejimi e’lon qilinganidan keyin ham Isroil hujumlari davom etayotgani va yangi qurbonlarga sabab bo‘layotganini ma’lum qildi.

Uning aytishicha, 2025 yil oktabrdan beri bu hujumlar oqibatida 591 falastinlik hayotdan ko‘z yumgan.

«Bu o‘limlar Isroilning gumanitar huquq va inson huquqlari bo‘yicha xalqaro huquq doirasidagi majburiyatlarini e’tiborsiz qoldirishni davom ettirayotganini ko‘rsatmoqda», - dedi Gomes BMTning Jeneva bo‘limida o‘tkazilgan brifingda

U o‘t ochishni to‘xtatish e’lon qilinganiga qaramay, hujumlar davom etayotganini ta’kidladi.

Gomes, shuningdek, Isroil bosqinchi kuch sifatida Iordan daryosining G‘arbiy qirg‘og‘ida ham o‘z majburiyatlarini bajarmayotganini qo‘shimcha qildi.

Uning so‘zlariga ko‘ra, yuritilayotgan siyosat ikki davlat to‘g‘risidagi qarorning amalga oshirilishini xavf ostiga qo‘ymoqda. U BMTning Inson huquqlari bo‘yicha boshqarmasi avvalroq bu borada tegishli hisobot e’lon qilganini eslatib o‘tdi.

Bundan oldin Isroil Xavfsizlik kengashi G‘arbiy qirg‘oqning rasman Falastin ma’muriyati boshqaruvidagi hududlarida nazorat va kuzatuv faoliyatini kuchaytirish to‘g‘risidagi qarorlarni ma’qullagan edi.

Yaqin Sharqdagi keskinlikning yangi to‘lqini 2023 yil oktabrida G‘azo sektorida boshlangan keng ko‘lamli qurolli to‘qnashuvlardan so‘ng yuzaga keldi. Xalqaro hamjamiyat va BMTning ko‘plab chaqiriqlariga qaramay, mintaqada barqaror tinchlikka erishish imkonsiz bo‘lib qolmoqda. 2025 yilning kuzida e’lon qilingan o‘t ochishni to‘xtatish kelishuvi insonparvarlik inqirozini yumshatish va tinch aholi o‘rtasidagi qurbonlar sonini kamaytirishni maqsad qilgan edi. Biroq, amalda harbiy harakatlarning davom etishi va Iordan daryosining G‘arbiy qirg‘og‘ida nazoratning kuchaytirilishi xalqaro huquq normalarining buzilishi hamda mintaqada ikki mustaqil davlat qurish g‘oyasining zaiflashishiga olib kelmoqda.