«Centrum Air» Рақобат қўмитасининг сўровига муносабат билдирди
«Centrum Air» Тошкент–Урганч рейсидаги ҳолат ортиқча чипта сотиш эмас, чақмоқ урган самолётни алмаштириш билан боғлиқ вазият эканини маълум қилди.
© Vaqt.uz | Javhar Chorshanbiyeva«Centrum Air» авиакомпанияси Тошкент–Урганч рейсида юзага келган можаро overbuking эмас, балки чақмоқ урган самолётнинг фавқулодда алмаштирилиши билан боғлиқлигини маълум қилди. Компания 42 нафар йўловчи рейсдан қолиб кетганини тасдиқлаб, уларга компенсация ва муқобил парвозлар таклиф қилинганини билдирди.
Рақобатни ривожлантириш ва истеъмолчилар ҳуқуқларини ҳимоя қилиш қўмитаси хусусий авиакомпаниялар — «Centrum Air» ва «Qanot Sharq» фаолиятида ортиқча чипта сотилиши ҳамда йўловчилар ҳуқуқларига риоя этилиши юзасидан Фуқаро авиацияси агентлигига расмий сўров юборган эди. Мазкур ҳолат юзасидан «Centrum Air» расмий баёнот берди.
Компания маълум қилишича, 2026 йил 19 май куни Тошкент–Урганч йўналишидаги C6089 рейси учун мўлжалланган «Airbus A330» самолётини чақмоқ урган. Шу сабаб ҳаво кемаси хавфсизлик нуқтаи назаридан техник кўрикка олинган ва рейс учун бошқа самолёт ажратишга тўғри келган.
Авиакомпания парвозларни кечиктирмаслик мақсадида кичикроқ сиғимга эга «Airbus A320» самолётидан фойдаланганини билдирди. Бироқ ўринлар сони камайгани сабабли 42 нафар йўловчи ушбу рейс билан уча олмаган.
«Centrum Air» рейсдан қолиб кетган йўловчиларга чипта маблағини тўлиқ қайтариш ёки энг яқин рейсларга, жумладан бошқа авиакомпаниялар орқали бепул қайта брон қилиш имкониятини таклиф қилган. Кутиш вақти узайган йўловчилар меҳмонхонага жойлаштирилгани ҳам айтилди.
Шунингдек, компания ҳар бир йўловчига кейинги ички рейс учун 50 фоизлик чегирма промокоди, битта бепул багаж жойи ва самолётда қулайроқ ўрин танлаш имкониятини берганини маълум қилди.
Авиакомпания Рақобат қўмитаси томонидан билдирилган асосий эътироз — «overbuking» амалиётини қатъий рад этди. Компания баёнотида «Centrum Air» самолётдаги ўринлардан ортиқча чипта сотиш амалиётидан фойдаланмаслиги, юзага келган ҳолат эса форс-мажор вазият экани таъкидланган.
Компания парвоз кечиккан ҳолатларда йўловчиларга олдиндан хабар берилиши, кутиш вақтида бепул озиқ-овқат ва ичимликлар тақдим этилиши, зарур ҳолларда меҳмонхона билан таъминланишини ҳам қўшимча қилди. Шунингдек, Centrum Air текширув учун сўралган барча ҳужжат ва статистик маълумотларни ваколатли органларга тақдим этишга тайёрлигини билдирди.
