Changpeng Jao: «Kripto egalari ulushi 10 foizga yetmagan»

Dunyodagi eng yirik kriptobirjalardan biri — «Binance» nazorat paketi egasi Changpeng Jaoning ma’lum qilishicha, jahonda kriptovalyuta egalari ulushi taxminan 8–10 foizni tashkil qiladi. Uning ta’kidlashicha, bu ko‘rsatkich keng tarqalgan tasavvurdan ancha past.

Jaoning so‘zlariga ko‘ra, kriptoaktivlar ulushi jahon boyligi tarkibida 1 foizdan ham kam. Bu esa industriya uchun kelgusi yillarda sezilarli o‘sish imkoniyati mavjudligini anglatadi. U bozorning hozirgi pasayish bosqichi avvalgilardan farq qilishini, institutsional ishtirok kuchayganini va bozor yetuklashganini qayd etdi.

Shuningdek, u AQSHda raqamli aktivlarni tartibga solish borasida yanada konstruktiv yondashuv shakllanayotganini uzoq muddatli barqarorlik omili sifatida baholadi.

Qisqa muddat xavflari

Jao qisqa muddatli prognozlarni spekulyativ deb atadi. Uning fikricha, kriptovalyutalar yuqori volatillikni saqlab qolmoqda, shu bois investitsiya qarorlari shaxsiy risk profiliga mos bo‘lishi kerak.

U markazlashgan va detsentralizlashgan platformalar o‘rtasidagi farqqa ham to‘xtaldi. Markazlashgan birjalar ommaviy auditoriya uchun qulay infratuzilma — akkauntlar, parollar va mijozlarga xizmat ko‘rsatish tizimini taklif qiladi.

Markazsizlashtirilgan protokollar esa texnik tayyorgarlik va yuqori darajada kiberxavfsizlikni talab qiladi. Qurilma yoki hamyon komprometatsiyasi aktivlarning to‘liq yo‘qotilishiga olib kelishi mumkin. Shu sababli bunday model mas’uliyatni to‘liq foydalanuvchi zimmasiga yuklaydi.

Uzoq muddatli strategiya

Kriptosanoat rivoji haqida gapirar ekan, Jao jamoalarni narx dinamikasi emas, mahsulot sifatiga e’tibor qaratishga chaqirdi. Uningcha, barqaror texnologik arxitektura, shaffof strategiya va aniq iqtisodiy model uzoq muddatda ustunlik beradi.

Asosiy mezonlar sifatida u foydalanuvchi mablag‘lari xavfsizligi, past komissiyalar, tranzaksiya tezligi va interfeys qulayligini sanab o‘tdi.