Экология қўмитаси флаер ёққан «Андижон» ФК фан клубини огоҳлантирди

Андижон вилояти Экология бошқармаси маълум қилишича, «Андижон» фан клуб масъулларига бундан буён стадионларда ҳамда оммавий тадбирлар вақтида тутунли пиротехника воситаларидан фойдаланиш қатъиян тақиқланиши тушунтирилган.

Бундан ташқари, 9 декабр куни ўтказилган экорейд давомида жами 3222 та объектнинг атмосфера ҳавосини муҳофаза қилишга оид қонунчилик талабларига қай даражада риоя қилаётгани ўрганилган ва 24 та ҳуқуқбузарлик маълум бўлган.

25 ноябрдан 9 декабргача бўлган ўрганишлар даврда 895 та қонунбузарлик ҳолати аниқланиб, барчаси бўйича маъмурий иш ҳужжатлари расмийлаштирилди. Қонун талабларини бузганлиги ва атроф-муҳитга салбий таъсир кўрсатгани учун жами 75 та объект фаолияти 10 иш кунига тўхтатилди. Шулардан 66 таси Тошкент вилоятида, 9 таси эса пойтахт худудида жойлашган.

Рейдлар давомида айрим объектларда камчиликларни бартараф этиш бўйича чоралар ҳам кўрилди. Жумладан, 37 та иссиқхонада филтр ўрнатилди, 6 та иссиқхона газ тармоғига уланди. Яна 7 та объект газга уланиш учун тегишли техник шартларни олиш мақсадида ариза топширди.

Тадбирлар давомида жамоат хавфсизлигига оид ҳолатлар ҳам кузатилди. «Андижон» фан клубига стадион ва оммавий тадбирларда тутунли пиротехника воситаларидан фойдалангани учун расмий тарзда огохлантириш берилди. Масъулларга бундай воситалардан фойдаланиш мутлақо тақиқлангани тушунтирилди.

Эслатиб ўтамиз, Бизнес омбудсман офисида экорейдлар вақтида тадбиркорлар мулкига зарар етказилгани ҳақида мурожаатлар кўпайгани сабаб, идора ваколатли органларни қонунчиликка риоя этган ҳолда ҳаракат қилишга чақирган.