Фарғона нефтни қайта ишлаш заводига йил охиригача 35 минг тонна нефт етказилади
Етказиб бериладиган хом нефт тўлиқ қайта ишланиб, ундан олинадиган бензин, дизел ёқилғиси, авиаёқилғи ва мой маҳсулотлари Ўзбекистон ички бозорига йўналтирилади.
Фарғона нефтни қайта ишлаш заводи Қозоғистон орқали транзит қилинган хом нефтни қабул қилишни бошлади. Корхона матбуот хизмати маълумотига кўра, жорий йил декабр ойи охирига қадар заводга жами 35 минг тонна нефт етказиб берилади. Ушбу хомашё тўлиқ қайта ишланиб, маҳсулотлар Ўзбекистон ички бозорига йўналтирилади.
Етказиб берилаётган нефт ҳисобидан бензин, дизел ёқилғиси, авиаёқилғи ҳамда турли мой маҳсулотлари ишлаб чиқарилади. Бу маҳсулотлар маҳаллий бозорда ёқилғи таъминотини барқарорлаштиришга хизмат қилади.
Saneg компанияси маълум қилишича, қўшимча хомашё ҳажмлари заводнинг ишлаб чиқариш қувватларидан тўлиқроқ фойдаланиш имконини беради. Бу эса нефт маҳсулотлари ишлаб чиқариш ҳажмини ошириш ва ички талабни қондиришда муҳим омил ҳисобланади.
Томонлар ўртасидаги келишувларга мувофиқ, бозор шароити қулай бўлган тақдирда Қозоғистон орқали нефт транзитининг йиллик ҳажми 500 минг тоннагача етказилиши мумкин. Бу Фарғона нефтни қайта ишлаш заводи учун узоқ муддатли барқарор хомашё манбасини шакллантиради.
Аввалроқ «КазТрансОил» компанияси Ўзбекистонга нефт транзити қайта тикланганини маълум қилган эди. Компания режасига кўра, декабр ойида Ўзбекистонга 35 минг тонна нефт етказиб берилади. Шунингдек, Қирғизистонга ҳам Қозоғистон қувурлари орқали 30 минг тонна нефт жўнатилиши белгиланган. Бу Қирғизистон учун 2017 йилдан бери илк бундай етказиб бериш ҳисобланади.
