Фармацавтика институти пойтахтдан вилоятга «қувилмоқда»: унинг ўрнига меҳмонхона қурилиши мумкин
Тошкент шаҳри марказидаги Фармацевтика институти Тошкент вилояти Зангиота туманига кўчириб юборилиб, институт бино ўрнига беш юлдузли меҳмонхона қуриш таклифи илгари сурилди.
Фармацевтика институтининг «Ойбек» метро бекати яқинидаги асосий биноси бўшатилганидан сўнг, у бузиб ташланиб, унинг жойига 1000 ўринли автотураргоҳ ва беш юлдузли меҳмонхона қурилиб давлат тасарруфига ўтказилади.
Стратегик ислоҳотлар агентлиги маълум қилишича, бу Тошкент шаҳар ҳокимлиги ва Соғлиқни сақлаш вазирлиги томонидан тақдим этилган лойиҳада ўз аксини топган. Лойиҳага кўра, Тошкент фармацевтика институтини Зангиота туманидаги «Tashkent Pharma Park» ҳудудига кўчирилади. Таклиф президент қарори лойиҳасига киритилган.
Тошкент фармацевтика институти 1937 йилда ташкил этилган бўлиб, шундан буён ҳозиргача пойтахт марказида фаолият кўрсатиб келмоқда. Таклиф амалга оширилса, олийгоҳ Зангиотадаги фармацевтика кластерига кўчиб ўтади.
«Tashkent Pharma Park» — Фармацевтика тармоғини ривожлантириш агентлиги ҳузуридаги инновацион илмий-ишлаб чиқариш мажмуаси ҳисобланади. У Зангиота туманидаги юқумли касалликлар шифохонаси яқинида жойлашган.
