Германиянинг жаҳон чемпионатидан чиқиб кетиши ортидан Нагельсман ўз келажагига ойдинлик киритди
Парагвайга қарши 1/16 финалдаги аламли мағлубият ортидан Германия терма жамоаси бош мураббийи Юлиан Нагелсман миллий жамоадаги келажаги борасида берилган саволларга жавоб қайтарди.
© vietnam.vnАввалроқ Парагвайга қарши кечган баҳсда Жаҳон чемпионатлари тарихида пеналтилар сериясида ҳеч қачон мағлуб бўлмаган Германия терма жамоасининг анъанасига барҳам берилгани ва жамоа мундиални тарк этгани ҳақида хабар берган эдик.
Ушбу натижадан сўнг Германия терма жамоаси бош мураббийи Юлиан Нагелсманнинг келажаги ҳақидаги саволлар кўпайди. Журналист ва инсайдер Фабрицио Романо бу борада Нагелсманнинг фикрини маълум қилди.
«Мен истеъфога чиқмайман. Агар Германия футбол федерацияси менинг 2028 йилгача қолишимни хоҳласа, қоламан. Агар улар бундай истак билдирмаса, бу лойиҳани тарк этаман», — деди Нагелсман. Унинг сўзларини Романо X ижтимоий тармоғидаги саҳифасида келтирди.
Шу тариқа, Германия терма жамоаси Жаҳон чемпионатидаги иштирокини якунлади. Парагвай эса энди 1/8 финалда Франция — Швеция жуфтлиги ғолиби билан куч синашади.
Маълумот учун, Германия терма жамоаси кетма-кет учинчи Жаҳон чемпионатида ҳам 1/8 финалга чиқа олмади.
Эслатиб ўтамиз, бундан аввал Жаҳон чемпионатидаги омадсизликдан кейин Жанубий Корея терма жамоаси бош мураббийи Ҳон Мён Бо истеъфога чиққанини маълум қилган эди.
