Ҳомиладорлик, туғиш ва меҳнатга лаёқатсизлик нафақаларини тайинлаш тартиби тасдиқланди
Ўзбекистонда келгуси йилдан давлат ижтимоий суғуртаси доирасида меҳнатга лаёқатсизлик ва туғиш нафақалари босқичма-босқич жорий этилади.
Ҳукуматнинг 2025 йил 17 декабрдаги 796-сонли қарори билан давлат ижтимоий суғуртаси доирасида вақтинча меҳнатга лаёқатсизлик ҳамда ҳомиладорлик ва туғиш нафақаларини тайинлаш ва тўлаш тартибини белгилайдиган низом тасдиқланди. Ушбу ҳужжат суғурталанган шахсларнинг ижтимоий ҳимоясини кучайтиришга қаратилган.
Низомга мувофиқ, суғурта ҳодисаси юзага келганда тўловлар икки босқичда жорий этилади. 2026 йил 1 январдан ҳомиладорлик ва туғиш нафақаси, 2026 йил 1 июлдан эса вақтинча меҳнатга лаёқатсизлик нафақаси тўланиши бошланади. Бу жараёнлар давлат ижтимоий суғуртаси тизими орқали амалга оширилади.
Нафақалар суғурталанган шахс иш берувчи билан меҳнат муносабатларида бўлган, фуқаролик-ҳуқуқий шартнома асосида хизмат кўрсатган ёки қонунчиликда белгиланган тартибда бошқа расмий фаолият билан банд бўлган даврда суғурта ҳодисаси юзага келган тақдирда тайинланади. Бунда ҳомиладорлик ва туғиш нафақасини олиш учун камида 10 ой, вақтинча меҳнатга лаёқатсизлик нафақаси учун эса камида 6 ой суғурта стажи мавжуд бўлиши шарт.
Вақтинча меҳнатга лаёқатсизлик нафақаси меҳнатга лаёқатсизлик варақасида кўрсатилган барча давр учун тўланади. Бироқ тўловлар бир календар йил мобайнида 182 календар кундан ошмаган муддат билан чекланади.
Ҳомиладорлик ва туғиш нафақаси миқдори суғурта стажига қараб белгиланади. Суғурта стажи 10 ойдан 24 ойгача бўлганларда ўртача ойлик иш ҳақининг 75 фоизи, 25 ойдан 60 ойгача бўлганларда 85 фоизи, 61 ой ва ундан ортиқ стажга эга бўлганларда эса 100 фоизи қўлланилади. Тайинланган тўловлар молиявий агент орқали амалга оширилади.
Эслатиб ўтамиз, аввалроқ 2026 йилдан бошлаб хусусий компанияларда ишлайдиган аёллар ҳам ҳомиладорлик нафақасини давлатдан олиши ҳақида хабар берган эдик.