«Иномарка»лар импорти: электромобиллар бензинли автомобилларни катта фарқ билан ортда қолдирди

2026-йилнинг январь-апрель ойларида Ўзбекистонга импорт қилинган транспорт воситалари сони кескин ошди. Бу ҳақда Божхона қўмитасидан маълум бўлди.

Қайд этилишича, жами транспорт воситалари импорти 221,2 млн доллардан 519,1 млн долларга чиқиб, 297,8 млн долларга (+134,6 фоиз) ошган. Импортнинг асосий қисми енгил «иномарка» автомобиллар (508,3 млн доллар) ҳисобига шаклланди.

Бунда электромобиллар импорти 2025-йилнинг мос даври билан солиштирилганда қарийб 4 баробар ошди — 5 863 донадан 23 079 донага. Натижада, Ўзбекистонга кириб келаётган электромобиллар сони бензинли автомобилларни ортда қолдирди.

Хориждан олиб келинган электромобиллар қиймати ҳам 220,8 млн долларга кўпайиб, 309,3 млн долларга етди. 2025-йилнинг 4 ойида 88,5 млн долларлик электромобиль олиб келинганди.

Шунга қарамай, ўтган йилга нисбатан чет элдан олиб келинган электромобилларнинг ўртача нархи 15 минг доллардан 13,4 минг долларга пасайган.

Бензинли автомобиллар импорти эса 3,9 фоизга камайиб, 5 793 донадан 5 568 донага тушган. Уларнинг қиймати ҳам 117,5 млн доллардан 115,8 млн долларга камайган.

Шунингдек, йил бошидан бери гибрид автомобиллар импортида кескин ўсиш кузатилди. Уларнинг импорти ўтган йили 329 та бўлган бўлса, жорий йилда 8,6 баробар ошиб 2 829 тага етди.

Бунда олиб келинган гибрид автомобиллар қиймати 7,5 млн доллардан 81,7 млн долларга кўпайди. Ўртача гибрид автомобиль қиймати эса, электромобиллардан фарқли равишда 22,6 минг доллардан 28,9 минг долларгача ошди.

Маҳаллий бозорда вазият қандай?

Ўзбекистонда ишлаб чиқарилган автомобиллар рўйхатида ҳам электромобиллар улуши ортиб, UzAuto Motors’нинг бозордаги иштироки камаймоқда.

I чоракда ишлаб чиқарилган маҳаллий автомобиллар орасида компания улуши ўтган йил билан солиштирганда 54,3 фоиздан 50,3 фоизга камайиб кетди.

Бу UzAuto’нинг бозордаги монопол позицияси секинлашиб бораётганини кўрсатиши мумкин. 

Бундан ташқари, маҳаллий ишлаб чиқарилган электромобиллар сони ҳам сезиларли ўсмоқда. Жумладан, BYD бренди остида сотилган электромобиллар сони 4 045 тадан 7 799 тага ошган.

Электромобиль эгаларига субсидия

Импорт сезиларли ўсишда давом этиши фонида Ўзбекистонда электромобилларни қувватлаш харажатларининг бир қисмини давлат қоплашни режалаштирмоқда.

Энергетика вазирлиги таклифига кўра, зарядлаш шохобчаларида сарфланган 1 kWh электр энергиясининг 300 сўмдан ошган қисми Давлат бюджети ҳисобидан қопланади. Бу механизм 2026-йил 1-майдан жорий қилиниши режалаштирилган.