Jazoni o‘tayotgan yoshlarga «ikkinchi imkoniyat» beriladi

O‘zbekistonda jazoni ijro etish muassasalaridagi yoshlarni qo‘llab-quvvatlash va ularni jamiyatga qayta integratsiya qilish maqsadida yangi tashabbus amalga oshiriladi. Prezident qaroriga muvofiq, «Ikkinchi imkon» nomli ijtimoiy reabilitatsiya milliy loyihasi yo‘lga qo‘yilmoqda.

Loyiha doirasida jazoni o‘tayotgan yoshlarni zamonaviy kasblarga o‘qitish tizimi bosqichma-bosqich joriy etiladi. Xususan, 2026-yil 1-iyundan boshlab Toshkent, Navoiy va Qashqadaryo viloyatlaridagi muassasalarda ushbu dastur amalga kiritiladi.

Keyinchalik, 2027-yil 1-martdan boshlab mazkur tizim respublikaning barcha hududlaridagi jazoni ijro etish muassasalariga kengaytiriladi. Bu orqali mamlakat bo‘ylab qamrovni kengaytirish va ko‘proq yoshlarni qamrab olish ko‘zda tutilgan.

Loyiha doirasida o‘quv kurslari 8–12 oy davom etadigan intensiv dasturlar asosida tashkil etiladi. Ular bevosita jazoni ijro etish muassasalari hududida o‘tkazilib, amaliy ko‘nikmalarni shakllantirishga qaratilgan bo‘ladi.

Shuningdek, kurslarga ijtimoiy xavfi katta bo‘lmagan, uncha og‘ir bo‘lmagan va ayrim og‘ir jinoyatlarni sodir etgan yoshlar jalb qilinadi. Ular nafaqat kasbiy bilimlar, balki xorijiy tillarni ham yagona intensiv dastur asosida o‘rganadi.

O‘quv dasturlarini muvaffaqiyatli o‘zlashtirgan ishtirokchilarga elektron shaklda sertifikatlar beriladi. Bu hujjatlar ularning keyingi mehnat faoliyatida muhim ahamiyat kasb etadi.