Жиззахдаги АЭС лойиҳаси бўйича жамоатчилик эшитувлари ўтказилади
Мазкур жамоатчилик эшитувларида билдирилган фикрлар лойиҳанинг кейинги босқичларида инобатга олиниши кутилмоқда.
«Ўзатом» агентлиги хабарига кўра, 23 декабр куни 11:00 да Жиззах вилояти Фориш туманидаги Боғдон аҳоли пунктида жойлашган 30-сон Маданият марказида Атом электр станцияси қурилиши бўйича жамоатчилик эшитувлари ўтказилади.
Агентлик барча манфаатдор томонлар, маҳаллий аҳоли ва фуқаролик жамияти вакилларини бунда фаол иштирок этишга таклиф қилди. Лойиҳа бўйича таклиф ва мулоҳазаларни info@uzatom.uz ва direksiyaaes@uzatom.uz электрон почта манзилларига юбориш мумкинлиги билдирилди.
Қайд этилишича, лойиҳа бўйича АЭСнинг умумий қуввати 2110 MW бўлиб, йиллик электр ишлаб чиқариш ҳажми 16–17 млрд kWh’ни ташкил этади. Бу кўрсаткич мамлакат энергия балансида 12–15 фоиз улушни таъминлайди. Иншоотнинг эксплуатация муддати 60 йил этиб белгиланган.
Аввалроқ «Ўзатом» директори ва АЭС қурилиши дирекцияси раҳбари жамоатчилик муҳокамалари савол-жавоб ҳамда овоз бериш шаклида ташкил этилишини маълум қилганди. Тадбирда билдирилган фикрлар лойиҳанинг кейинги босқичларида инобатга олиниши таъкидланганди.
Эслатиб ўтамиз, Ўзбекистон «Ядровий зарар учун фуқаролик жавобгарлиги тўғрисида»ги Вена конвенциясига қўшилгани ҳақида хабар берилганди.
